Mesaz Prezidan Wavel Ramkalawan alokazyon Lazournen Konstitisyon 2023 |18 June 2023
‘Anba nou Konstitisyon, nou pou kontinyen bouz devan konman en nasyon fyer’
«Dan premye fraz nou Konstitisyon lepep Seselwa i ekprim son rekonnesans anver Bondye Toupwisan pour sa loner ki in donn nou pour viv dan enn bann pli zoli pei dan lemonn.
«Ozordi kan nou selebre 30-an nou Konstitisyon, nou ankor enn fwa remersye Bondye pour tou son benediksyon e nou remet nou pep ek nou pei anba son proteksyon ek gidans.
«Sa selebrasyon i devret pous nou pour reflesir lo sa semen long, difisil e ranpli avek defi ki nou’n traverse pour nou ariv kot nou ete ozordi. Pour nou kapab kontinyen ranforsi sa larout demokratik i tre enportan ki nou kontinyen pouse pour ranforsi latransparans, rann kont e bon gouvernans toulezour dan nou pei. Anplis ki sa, i lobligasyon sak sitwayen ek lorganizasyon pour kontinyen protez drwa imen sak endivi, lalit kont koripsyon e asire ki fon piblik i byen ganny servi. I osi nou devwar pour kontinyen vin pli determinen kont tou fleo sosyal tel ki drog, lalkol, labi zanfan ek tou kalite trafik ilegal ki kapab detri fabrik nou sosyete e anpes nou akonpli bann lobligasyon ki nou ti donn nou lekor 30-an pase atraver nou Konstitisyon.
«Nou zoli pei Sesel in fer en long larout depi 1993 e nou pa devret aret persevere pour nou fer pli byen ankor e atenn bann pli gran lakonplisman pour sa zenerasyon ozordi ek lezot alavenir. «Dan sa 30-an nou’n travay dir, nou’n persevere anfas ladversite e nou’n pran bann desizyon vreman brav. Nou’n respekte nou konstitisyon me nou’n osi pran linisyativ pour nou amelyor li kot ti neseser e kan nou ti bezwen fer li pour nou kontinyen dan sa lamars pour donn nou pep en meyer lavi e anbras bann demann modernite.
«Nou Konstitisyon i non selman nou lalwa siprenm, me i en dokiman vivan ki adapte son lekor avek sanzman ek transformasyon nou sosyete Seselwa.
«Ozordi nou kapab dir ki nou Konstitisyon in montre son lafors, kan apre 43-an Sesel in kapab fer en tranzisyon gouvernman dan lape san okenn vyolans. Tou bann diferan lenstitisyon in montre respe pour sa Konstitisyon anver ki zot ti fer serman pour proteze. Anba sa menm Konstitisyon, nou pou kontinyen bouz devan konman en nasyon fyer.
«Ozordi tou dimoun i annnan son plas dan nou zoli pei. Tou dimoun i kapab develop son potansyel e atenn son rev si i determinen e si i travay dir. Sak endividi i ganny son drwa respekte e tou dimoun i tonm anba lafors lalwa. Se sa ki mon pou kontinyen ankouraze pour ki Sesel i vreman vin sa pei pour tou son zanfan. Mon viv dapre sa promes.
«Lo sa 30enm lanniverser nou Konstitisyon, mon renouvle sa langazman e mon lans en lapel ek tou Seselwa pour angaz zot pour respekte e protez nou Konstitisyon a tou moman.
«Bonn Fet lazournen Konstitisyon.»