Lazans gouvernmantal lo Praslin |12 October 2019
Prezidan i kontiny son seri vizit
Prezidan Danny Faure in kontiny son seri vizit dan bann lazans gouvernmantal Grand Anse Praslin yer.
Delegasyon prezidansyel ti konmans zot vizit dan batiman Fon Pansyon. La vizit kot 4 diferan lazans ti lo progranm e bann travayer ti ganny sans vwar sa delegasyon pour diskit zot bann lakonplisman, defi e osi konsern.
Departman lanplwa ti premye pour resevwar delegasyon prezidansyel e la Madanm Vicky Aglae ti gid zot. Lekip ki konpri 6 anplwaye ti fer resorti bann servis ki zot ofer.
Madanm Kate Pierre li i ti resevwar delegasyon prezidansyel kot Fair Trading Commission (FTC) e la ansanm avek lot zofisye sa lazans lo Praslin, Msye Lenny Lablache, zot ti ganny sans fer en konversasyon avek Prezidan Faure.
Answit delegasyon ti diriz ver Landscape and Waste Management Agency (LWMA) e Msye Estephane Germain ti diriz vizit e entrodwir delegasyon avek serten parmi zot 27 anplwaye ki ti prezan. Parmi bann konsern sa lazans se nesesite pour revwar zot scheme of service e osi lenportans ‘empower’ bann pti kontrakter lo bann meyer pratik pour zer zot biznes.
Lofis Ministry of Habitat, Lands, Infrastructure and Land Transport ti osi akeyir sa delegasyon prezidansyel kot Prezidan Faure ti ganny sans demann zot lo diferan proze lakaz ek later ki sa minister pe antretenir. Vizit ti termin kot biro Lazans Proteksyon Sosyal ki sitie dan biro ladministrasyon distrik, en lazans avek en lekip 9 endividi ki kouver loperasyon lo Praslin e La Digue lo en baz rotasyon.
Prezidan Faure ti osi profite pour vizit serten lezot lazans ek lakonpannyen prive ki sitye dan batiman Fon Pansyon e biro ladministrasyon distrik. Sa ti enkli H Savy Insurance Company, Enterprise Agency Seychelles (Esa), Labank Devlopman Sesel, Departman Imigrasyon ek Komisyon Reveni Sesel.
Alafen vizit, anplwaye dan bann diferan lofis ti eksprim zot lapresiasyon pour lefet ki sa delegasyon ti’n fer sa deplasman pour vin vwar zot. Sa i vin konman en lankourazman pour zot mentenir zot zefor e zot swete ki bann tel vizit ava kontinyen.
Prezidan Faure ti plitar apremidi rankontre manm piblik ki ti’n demann li lapwentman an prive.
Bann portre ki akonpanny lartik i montre Prezidan Faure pandan son vizit dan bann diferan lazans gouvernmantal lo Praslin.
Teks: Nadia Bedier
Portre: Romano Laurence
