Bann zenn stilis i demontre zot kreativite atraver Lafoli Lanmod |28 October 2023

Festival Kreol i letan kot nou selebre tou sa ki fer nou en pep kreol. I pa zis en letan kot nou reviv nou tradisyon me i osi enn kot nou selebre nou kreolite dan tou laspe, e sa i enkli nou kreativite.

Bann stilis i ganny sans pandan letan Festival Kreol demontre zot kreativite, linovasyon e osi byen ki zot talan dan lanmod atraver enn bann aktivite popiler lo kalandriye sa festival. Sa i Fon Lanmal ki sa lannen in ganny apele Lafoli Lanmod.

Sa levennman ti ganny fer Domaine de Val des Près, Au Cap resaman.

Bann model ti defile dan diferan resanz e akseswar fer par bann stilis lokal.

Pandan sa sware trwa stilis ti ganny pri pour meyer zenn stilis, meyer stilis profesyonnel e meyer konsep.

Isis Loze, en zenn stilis ki ankor pe fer son letid kot Lenstiti pour Lar ek Desen, ti ranport pri pour meyer zenn stilis.

Manmzel Loze i dir nou i fer premye fwa ki i partisip dan en tel levennman e sa pri ki i’n ranporte i donn li lankourazman pour kapab persevere dan son letid.

Tenm son koleksyon ti Losean e son koleksyon ti apel ‘A reflection of a star’.

I ti fer resorti ki sa tenm ti donnen dan en leson e sete la ki i ti ganny enspire pour pran sa topik.

Son koleksyon ki ti baze plis lo bann zetwal delo sale ti konpri senk resanz pour lasware.

Sa zenn stilis ti dir ki i ti soke letan i ti ranport sa pri me ki i vreman kontan.

I ti azoute ki i ti santi li eksite pour pran par dan sa aktivite e vin demontre son koleksyon devan en tel lodyans pour premye fwa.

En lot zenn fiy ki ti pe montre son talan lanmod e tekstil sa zour swar ti Emma Larue ki li osi i en etidyan sa lenstiti.

Manmzel Larue li i ti ranport pri pour meyer konsep avek en koleksyon anba tenm ‘Ocean tentacles’.

Son koleksyon ti annan senk resanz e bokou lanfaz ti ganny mete lo laliny, laform e kouler sa kreatir delo sale ki apel zourit.

Bann kouler dan son koleksyon ki ti plis bann lenz ‘casual’ ti ble, ver e en pti pe blan.

Pri pour meyer stilis profesyonnel ti al pour Athalia Barbé ki ti vin avek en koleksyon apele ‘Kouler nou larises’. Sa koleksyon resanz i met an valer nou leritaz Afriken dan lanmod e tekstil e i eksplor pouvwar bann kouler – lor, rouz, ble, ver e blan.

Mandy Bertin