En seremoni senp e solannel |25 June 2025
Etidyan lekol Anse Boileau i selebre Lazournen Konstitisyon
Etidyan nivo senk lekol segonder Anse Boileau in semenn pase demontre zot patriotizm atraver en seremoni spesyal fer monte paviyon ki ti’n organize kot sa lekol par departman pastoral alokazyon Lazournen Konstitisyon pei.
Sa seremoni solannel, senp me memorab, ti fer par bann etidyan ki manm ‘scout’ kot sa lekol. I ti enkli en lamars par sa bann manm ‘scout’, fer monte paviyon ensi ki sanson patriotik performen par etidyan zot menm.
Letan i ti pe adres bann etidyan S5, zot ansennyan ek paran, direktris par enterim, May Adrienne, ti dir zot prezans i sinifi lenportans ki sak endividi i mete lo listwar pei.
“Ozordi, pandan ki nou rasanble otour nou zoli drapo nasyonal, nou pa zis pe obzerv en seremoni; nou pe osi partisip aktivman dan en moman refleksyon ek selebrasyon. Lazournen Konstitisyon, ki ganny selebre tou le lannen le 18 Zen, i mark ladopsyon nou Konstitisyon aktyel – lalwa siprenm nou pei. I fondasyon lo ki nou sosyete demokratik in ganny batir, i protez nou drwa, i dekri nou responsabilite, e i form konpozisyon nou nasyon,” Madanm Adrienne ti dir.
I ti azoute ki konman en kominote lekol, Lazournen Konstitisyon i annan en sinifikasyon tre spesyal kot i rapel bann valer ki soutenir sistenm ledikasyon: lazistis, legalite, liberte, ek respe pour lalwa ensi ki ranforsi nou langazman pour nouri sitwayen responsab ki konpran zot drwa ek devwar, e ki pare pour kontribye pozitivman dan lavenir Sesel. I ti demann bann etidyan pour konpran e apresye lenportans sa levennman.
“Nou bann zanfan, mon ankouraz zot pour reflesir lo sa ki sa zour i vedir. Konpran ki bann laliberte ki zot gannyen, bann loportinite ki zot annan, e nou sosyete ki nou viv ladan ki tou in ganny donnen e formen par bann prensip ki’n ganny anrasinen dan nou Konstitisyon. Anbras sa bann prensip, e viv annakor avek zot,” direktris par enterim ti azoute.
Letan i ti pran laparol lo lapar lezot etidyan, Joy Holder, ki osi reprezantan dan lasanble zenn, ti dir sa lazournen pa zis en dat lo kalandriye me en senbol ki nou ete konman en pep “for, inifye e lib”.
“O sant nou selebrasyon i ‘Preamble’ konstitisyon. I koz lo laliberte, lazistis, dignite, egalite ek lape. Sa pa zis bann mo me bann valer ki nou annan konman en nasyon, en pep e espesyalman konman zenn,” Joy ti dir.
I ti azoute ki konman en zenn, i santi li onore pour adres zot akoz sa zour i fer zot tou rapel ki konman en zenn zot annan en rol pour zwe. “En rol pour protez nou bann valer, respe nou listwar, e konstrir nou nasyon avek linite ek en bi.”
“Sa paviyon i rapel nou lalit lepase, lape ki nou zouir ozordi e lavenir briyan ki nou pe konstrir ansanm,” Joy ti azoute.
Dapre direktris departman pastoral, Lindi Lepere, sa levennman ki’n fer pour premye fwa sa lannen, i form parti aktivite kalandriye lekol e i pou aprezan vin enn anyel. I eksplike ki i vize ver etidyan nivo segonder senk ki pe fini lekol sa lannen. “Nou oule fer en aktivite memorab pour zot avan zot kit lekol, e nou’n mazinen ki en tel seremoni solannel e enportan i ava reste marke dan zot memwar,” Mis Lepere ti dir.
Sa bann portre i montre moman for sa seremoni fer monte paviyon Mardi le 17 Zen.
Lartik ek portre kontribye