Kominike lapolis |15 July 2025
Kominike lapolis
Zofisye lapolis i sov en zonm 77-an
Lavi ek propriyete en zonm 77-an sorti Mont Buxton in ganny sove yer granmaten par en group zofisye lapolis sorti santral, ki ti lo en patrol routin ver 2er 39 bomaten dan sa distrik.
Letan ki sa group zofisye ti pe fer patrol, zot ti santi en loder abnormal, kot i paret ti annan keksoz pe brile. Sa ti atir zot latansyon pour rod sours sa loder. Pandan zot patrol apye zot ti apersevwar gro lafimen pe sorti dan en lakaz.
Deswit sa bann zofisye ti al verifye e apre plizyer lesey zot ti apersevwar en zonm pe dormi dan sa lakaz. Zot ti enform li lo sa sitiasyon e retir li dan lakaz. Sa bann zofisye ti’n kapab etablir sirplas ki dife ti’n ganny kit alimen anba en kastrol lo en cooker ki ti pe konmans pran dife. Zot ti reisi met sitiasyon anba kontrol.
Departman Lapolis i salye louvraz ki sa group zofisye ki’n reazir tre vit pour anpese ki sa sitiasyon i koz fatalite e osi detri lezot lakaz dan zalantour.
*******
Sispe vol an servan vyolans i lo rimann
En zonm 45-an sorti Sans Soucis i lo rimann 14 zour konman sispe dan en ka vol an servan vyolans ki ti raporte avek lapolis Dimans le 13 Zilyet 2025. Sa lensidan ti ariv dan rezyon lavil. Sa sispe ti’n fek ganny large prizon le 7 Zilyet 2025.
*******
De Sid Afriken i rimann konman sispe dan en ka drog
En madanm 45-an avek en zonm 46-an, toulede avek nasyonalite Sid Afriken, in pas devan Lakour Siprenm yer bomaten, kot zot in ganny rimann pour 14 zour.
Sa i konman sispe dan en ka lenportasyon en drog kontrole, konplo pour enport en drog kontrole e konplo pour trafik en drog kontrole, ki lapolis pe fer lanket ladan.
Sa de sispe ti ganny entersepte par zofisye ladwann apre zot larive lo erport Pointe Larue, Vandredi le 11 Zilyet 2025, abor en vol Air Seychelles sorti Johannesburg.