Kominike lapolis |19 July 2025
En zonm i ganny sarze pour lofans labi seksyel
Lakour Siprenm in yer formelman sarz en zonm 28-an sorti Beau Vallon pour lofans labi seksyel lo en miner, e pour donn en miner en drog kontrole.
Sa akize ti komet sa lofans le 29 Zen 2025, dan rezyon Beau Vallon, e sa lensidan ti ganny raporte avek lapolis le 3 Zilyet 2025.
Sa zonm ti deza lo rimann antretan ki younit Proteksyon Zanfan dan lafors lapolis ti pe fer lanket dan sa ka. Ziz in rimann sa akize prizon Montagne Posée, e i ekspekte repas devan lakour le 31 Zilyet 2025.
*******
De dimoun i kondannen pour trafik drog
Jean-Paul Banane aze 34-an sorti Anse Boileau ek Vanessa Payet aze 32-an sorti Baie Lazare in kondann pour trwa ka devan Lakour Siprenm. Sa i pour lofans trafik en drog kontrole, an posesyon en drog kontrole e an posesyon zartifay pour fasilit servi ou trafik en drog kontrole.
Dan premye ka, ziz in kondann Banane ek Payet 2-an prizon sakenn, avek en lanmann 40 mil roupi sakenn, ki zot pou bezwen peye avan 1-an. Ziz in ordonnen ki zot santans prizon i ganny sispann pour 3-an.Dan dezyenm ek trwazyenm ka, ziz in kondann sakenn en lanmann 5 mil roupi, kot zot pou bezwen pey li avan senk mwan.
Banane ek Payet ti komet sa lofans le 26 Zen 2024, Anse à la Mouche, landrwa kot zot ti pe reste. Lapolis ti aret zot an posesyon 46.40 granm eroin, 7.8 granm kanabis e an posesyon en balans nimerik ki lo la ti annan latras en drog kontrole apele hashish.