Kominike Lapolis |10 September 2025
De zonm i ganny sarze pour lofans relye a trafik imen
Michel Mondon aze 42-an ek Stephane Mondon aze 37-an sorti Anse Forbans, Takamaka, in formelman ganny sarze devan Lakour Siprenm pour lofans relye avek trafik imen.
Michel Mondon in ganny sarze pour lofans ede e ankouraz trafik imen, e Stephane Mondon li in ganny sarze pour lofans trafik imen ek blansisaz larzan, tandis ki en lot zonm ki ti osi lo rimann konman sispe dan sa ka, in ganny large san okenn sarz.
Sa i dan lanket ki lapolis pe fer kot en zonm aze 27-an sa letan, sorti dan les Mahé, ti ganny raporte manke avek lapolis le 17 Zilyet 2020.
*******
Lapolis i fer lapel pour lenformasyon lo dimoun raporte manke
Lapolis pe ankor enn fwa lans en lapel avek manm piblik ki annan lenformasyon kredib lo nenport endividi ki’n raporte manke avek lapolis ant lannen 2019 a 2025, pour vin devan.
Manm piblik ki annan lenformasyon kredib i kapab antre an kontak avek Sant Komann lapolis lo 4288000 pour koz avek zofisye ki responsab lofis pour bann dimoun manke, ou sekyon Relasyon Piblik dan Lapolis, atraver nimero 4288181, ouswa email info@police.gov.sc , ou atraver bann platform lapolis lo rezo sosyal. Nimero whatsapp ofisyel pour lapolis i 2628815.
Departman lapolis i oule reasir nenport endividi ki vin devan, ki tou lenformasyon ki ganny resevwar pou ganny trete avek konfidansyalite.