Kominike Lapolis |23 September 2025
Lakour i prolonz detansyon en sispe dan setyenm ka aksidan fatal
Sa sispe zonm 52-an sorti Copolia, ki ti pe ganny detenir par lapolis konman sispe dan ka lanmor en zonm 71-an sorti Eden Village le 20 Septanm 2025, Roche Caiman in yer bomaten pas devan Lakour Mazistra, Ile Du Port, kot in annan demann pour kontinyen gard li lo rimann.
Sa i pour lofans okazyonn lanmor en endividi par dray dan en fason danzere ou neglizan.
Mazistra ki ti pe ekout sa ka in akord demann prosekisyon e rimann sa sispe 3 zour an detansyon lapoli. I ekspekte repas devan lakour Zedi.
Antretan en madanm 49-an sorti Beau Vallon, ki ti’n osi ganny arete dan sa ka, li in ganny large.
Sa lensidan i setyenm ka aksidan fatal pour 2025. Dapre rapor inisyal ki lapolis in ranmase, sa defen ti pe travers semen an sortan direksyon bor lanmer pour al ver lekol Plaisance segonder letan i ti ganny tape avek en transpor ki ti pe fer direksyon lavil. Sa transpor pa ti arete. En lot transpor ki ti osi pe fer direksyon lavil ti mont lo sa zonm, kot la i ti pri anba sa transpor.
Lazans servis tenny dife ek sovtaz ti entervenir pour lasistans. Sa zonm ti ganny sertifye mor sirplas plitar par patolozis lapolis.