Prizonnyen Michael Agnes in ganny arete |24 November 2025
Prizonnyen Michael Agnes in ganny arete
Servis Prizon Sesel in konfirmen ki prizonnyen Michael David Agnes, ki ti sove prizon Montagne Posée le 21 Novanm, in ganny arete yer granmaten, dan en loperasyon konzwent ant lafors lapolis Sesel ek Servis Prizon Sesel.
Dan en kominike, servis prizon i dir sa loperasyon ti ganny egzekite dan en fason vit, profesyonnel san okenn lensidan.
I azoute ki Agnes in retourn an detansyon servis prizon e tou protokol sekirite in ganny reetablir.
En lanket in konmanse pour etablir sirkonstans ki in sove an detansyon, osi byen ki aksyon kont okenn endividi ki'n kapab abrit oubyen asiste li pandan sa peryod ki i ti ilegalman an liberte.