Mesaz Nouvo Lannen Prezidan Patrick Herminie |31 December 2025
Mesaz Nouvo Lannen Prezidan Patrick Herminie
‘Les nou solidarite pour kanmarad reste sa konpa ki gid nou ver en lavenir briyan’
“Dan sa moman tranzisyon, ant en lannen ki pe terminen ek en nouvo lannen ki pe konmanse, mon pe adres zot pa zis konman bann sitwayen, me konman en sel gran fanmiy Seselwa, eparpiye e inifye atraver nou ban zil e atraver lemonn.
“Lannen 2025 ti mark en nouvo sapit dan nou listwar. Zot in swazir solidarite, lazistis, e en lavenir fonde lo legalite pour tou.
“Depi ki mon’n pran responsabilite konman Prezidan Larepiblik, nou’n konmans pran bann desizyon enportan ki reflekte lavolonte pep Seselwa, e mon reste angaze pour travay pour byennet tou Seselwa.
“Tou progre dan nou listwar in baze lo nou krwayans, ki en meyer lavi pour nou pep i pa zis en laspirasyon me en realite.
“Atraver vizyon, disiplin ek kouraz, nou pa’n zanmen les okenn defi determin nou desten.
“Mon swe pour sa nouvo lannen i senp; olye dout, olye lafreyer, olye divizyon annou mars annavan, avek plis determinasyon ek plis konfidans.
“Nou lafors i non selman linite, me osi dan nou kapasite pour krwar dan nou lekor, pran responsabilite, e krwar dan lavenir nou pei.
“Ler nou debout ansanm, napa okenn defi ki pli gran ki nou.
“An 2026, annou ranforsi sa krwayans, vin pli ini, annou kree plis prosperite pour sak lakour, annou protez nou losean pour bann zenerasyon e annou asire ki nou fitir kominote i ranpli avek loportinite.
“Pour nou lazenes, diriz avek kreativite, travay avek lentegrite pour akonpli zot rev, rezet kalonmni ek legoizm. Fodre pa zot oubliye ki lavenir nou pei i dan zot lanmen.
“Pour nou bann dimoun aze, kontinyen donn nou lafors atraver zot lasazes, zot sakrifis ek lanmour pour nou pei.
“Pour tou Seselwa, ki nou solidarite pour kanmarad i reste sa konpa ki gid nou ver en lavenir briyan.
“Ki sa nouvo lannen i anmenn lape, lasante, ek nouvo lespwar pour nou tou.
“Ki Bondye i beni zot.
“Ki Bondye i beni nou pei Sesel.
Dr Patrick Herminie
Prezidan Larepiblik Sesel