Prezidan Faure i akey e felisit en group travayer servis piblik ki’n pran zot retret |28 February 2020

Prezidan Faure dan en portre souvenir avek son bann envite (Portre: Louis Toussaint)

• Alain Lucas i annan pli long letan travay avek 47-an servis

Plis ki en 40enn travayer servis piblik, prensipalman bann ansennyan avek plis ki 30-an servis, ti yer ganny akeir e felisite par Prezidan Danny Faure State House

pour zot long lannen servis ek devosyon dan zot travay.

Prezidan ti osi remet zot en pti kado an siny son lapresyasyon.

Msye Alain Lucas, en arsivis prensipal ki ti ziska son retret direkter Arsiv Nasyonal, li in pas pli long letan travay dan servis piblik avek 47-an servis.

Letan i ti adres sa group retrete ki konpri plis madanm, Prezidan Faure ti eksprim son loner ek lazwa pour akey e felisit sa group travayer ki’n dedye tou sa kantite lannen zot lavi o servis piblik.

“I en loner ek plezir pour mwan akoz zot reprezant pilye nou sosyete e zot in donn bokou zot letan o servis nou nasyon e konman prezidan mon santi i mon devwar e mon responsabilite senser pour mwan dir zot en gro mersi.”

“Me ler ou pran ou retret ou anvi kontinyen viv ou lavi dan en kominote kot i annan trankilite e en sosyete ki annan larmoni, stabilite ek lape me non pa donn ou lavi, ou letan e fer sakrifis pour servi ou nasyon e pour ki ler pour ou pran ou retret ou bezwen fer fas avek diferan kalite problenm,” Prezidan Faure in fer resorti fortman.

In demann tou dimoun dan kominote pour annan respe e pour valoriz travay dir tou sa bann dimoun ki’n kre sa fondasyon ki ozordi nou pe debout lola me ki prezan zot in pran zot retret e bezwen repoze. Nou dwa zot sa respe.

“Nou bezwen fer sir ki dan kominote kot zot pe reste i annan trankilite e dan zot kominote zot ganny respekte e zot ganny sipor,” Prezidan Faure in dir.

I’n asir sa bann retrete ek lezot ki pou pran zot retret plitar ki i pou asire ki tou dimoun ki deside pran zot retret zot viv dan en pei anpe e stab e ki i pou kontinyen travay pour asire ki pandan zot retret zot kontinyen zouir en bon kalite lavi e dan plis konfor.

Antretan tou sa bann dimoun ki’n pran zot retret zot dir zot in vreman fatige e zot santi zot bezwen al repoze e osi sed plas pour bann travayer ki pli zenn avek plis nouvo lide.

Msye Lucas, ki aze 65-an, i dir i ti vreman kontan son travay e i’n demann bann zenn pour konsider en karyer dan prezerv nou bann vye dokiman ki nou listwar e nou pase.

“Lepase i en semen pour lavenir e i annan en bezwen pour plis dimoun zwenn arsiv e ganny sipor lezot arsiv dan lemonn pour fer nou kontinyen devlope,” Msye Lucas i dir.

I’n fer resorti ki bann problenm avek mwazi i parmi bann defi ki pa zis arsiv Sesel me plizyer arsiv dan lemonn i fer fas avek. I dir La Reunion menm a en serten moman ti bezwen demolir son batiman arsiv e rekonstrir en lot pour kapab kontrol mwazi e zot avek sipor Lafrans ki annan bokou mwayen zot in reisi vwar en solisyon.

Msye Lucas i dir meyer fason kontrol mwasi se pour digitalise tou bann dokiman e fer zot aksesib pour piblik, en keksoz ki deza pe deroule.

Pandan son letan retret Msye Lucas i dir i pou voyaze e al dekouver bann pei ki i pa ankor vizite parey Lostrali ek lezot.

I dir i pa ekspekte santi li annwiye pandan son retret akoz i kontan fer bokou aktivite kot son lakour parey plante e fer bann pti travay kot i toultan annan bokou keksoz pour fer.

Pour Madanm Joyceline Lozaique aze 63-an ki’n travay dan servis piblik pour 40-an, ti’n ler pour li repoze.

“Monn vreman rente, fer plizyer louvraz, mon’n dan URS depi son louvertir kot mon’n fer en ta lannen avan mon ti al travay dan tarmac kot mon’n fer ankor en ta lannen e la mon’n vreman fatige avek mon lazanm ki pa tro bon,” Madanm Lozaique i dir.

I’n fer resorti ki i pou zis viv son lavi e zouir son retret trankilman.

Madanm Sonia Louange ki’n pas 45-an son lavi konman en ansennyan e ki ozordi aze 63-an i dir bann defi dan ledikasyon ozordi i demotiv ansennyan en kantite me li i kontan sa bann letan ki in donn bann zanfan e la aprezan i pou profite pour li repoze e pas letan avek son zanfan ek pti zanfan.

Lo son kote Msye Michel Moustache ki’n fer 45-an dan servis piblik li osi i kontan pour al pran enpe repo. Bokou dimoun dan sid Mahé i konn li konman sa fakter fidel Anse Royale dan bann lannen tar 70 ek 80 anmontan avan ki i ti responsab Lapos dan sa rezyon. Apre plizyer lannen i’n transfer Lapos anvil kot ziska son retret i ti Zofisye Lyezon kot Seksyon Parsel.

Msye Moustache i dir i profite pour zouir son retret e fer bann pti louvraz zournen tanzantan.

Pour Msye Jerris Cesar, bokou i konn li konman en lantrener foutbol ki aktyelman pe antrenn lekip Northern Dynamo, bann zenn lakademi All Stars osi byen ki bann etidyan segonder Plaisance.

Msye Cesar ki’n pas 40-an konman en ansennyan ledikasyon fizik dan plizyer lekol i dir ki aprezan i pou annan plis letan pour dedye a son spor prefere. Menm si i dir i pou mank enpe son routin lekol, i pou reste an kontakt avek bann zanfan atraver lakademi e lantrennman bann zafan segonder Plaisance.

Marie-Anne Lepathy