Mesaz Prezidan Danny Faure alokazyon Lafet Travayer 2020 |02 May 2020
Prezidan Danny Faure
‘Nou kapab releve ansanm’
«Annou reste determinen, rezilyan e solider pour nou relev nou pei e relev nou lekonomi,» Prezidan Danny Faure in demann tou Seselwa dan son mesaz alokazyon Lafet Travayer ki ti selebre yer le 1er Me.
Mesaz Prezidan Faure i lir koumsa :
«Lafet travayer i en zour enportan dan lavi en travayer. I en zour refleksyon lo lakonplisman nou drwa travay e i en zour selebrasyon avek nou bann koleg travay.
«Sa lannen, nou pe konmemor Lafet Travayer dan en fason diferan. Nou selebrasyon i osi diferan. I en selebrasyon avek bokou refleksyon. I dan en letan kot travayer dan Sesel e dan lemonn antye pe ganny profonnman afekte par viris corona. Pandan sa moman, plis ki zanmen, nou rapel ki nou nasyon e nou lekonomi in ganny batir lo lasyer nou travayer. Ozordi mon dir en gran mersi sak travayer ki’n konpran vizyon pei, ki’n transpire, ki’n korpere, ki’n travay ansanm pour anmenn en rezilta ki’n fer nou fyer. Apre travay dir, i annan prosperite.
«Sa dernyen mwan isi Sesel, serten fason travay in sanze. Travayer dan servis esansyel ek servis kritik in kontinyen travay pour deservi popilasyon, pandan letan ki pei pe fer fas avek COVID-19. Pour lezot travayer, zot landrwa travay in vin zot lakour e bann mwayen teknolozi in ganny servi pour travay. Travayer dan sekter tourizm ek lezot aktivite relye avek sa sekter ki ti en pilye nou lekonomi, in ganny severman afekte. Nou’n bezwen adapte avek sa nouvo sitiasyon.
«Anmezir ki nou met nou pare pour fer fas avek sa nouvo realite ki COVID-19 in met nou ladan, nou tou konman travayer nou bezwen readapte e pli enportan, nou bezwen reste touzour ini e solider. Annou mazinen ki tou travay i annan valer, akoz tou travay i annan son plas dan devlopman pei. Tou travay pou ed Sesel re-debout lo son lipye ekonomikman. Alor tou travayer i merit valoriz travay ki zot fer e fer li avek devosyon ek langazman.
«Mon konnen kot nou’n sorti ansanm, mon konnen kote nou ti’n arive ansanm e mon konnen ki nou kapab releve ansanm.
«Annou reste determinen, rezilyan e solider pour nou relev nou pei e relev nou lekonomi.
«Mon swet tou travayer en bonn fet.»
Sours : Biro Prezidan