Follow us on:

Facebook Twitter LinkedIn YouTube

National Assembly

Sesyon demann kestyon dan Lasanble Nasyonal |04 April 2019

Bann nouvo proze konblaz i ekspekte kout anviron 48 milyon ero

Nouvo proze pour konble senk zone lo lakot les Mahé e en pti zil dan labe Grand Anse Praslin i ekspekte kout pei anviron 48 milyon ero (anviron 744 milyon roupi), Lasanble Nasyonal in aprann.

Nou ava rapel ki Prezidan Danny Faure ti anons plan gouvernman pour fer ankor konblaz alavenir dan son mesaz Leta Lanasyon an Fevriye.

Minis pour Labita, Lenfrastriktir ek Transpor lo Later, Pamela Charlette, ti donn plis detay lo sa size dan Lasanble Nasyonal Mardi apremidi letan i ti pe reponn en kestyon notis prive demande par dirizan Lopozisyon Wavel Ramkalawan.

Dan son kestyon, Onorab Ramkalawan ti anvi ganny met o-kler lo sa bann pwen swivan:

  • Bann proze konblaz oubyen stokaz disab ki gouverman pe anvizaze fer byento e konbyen zot pou koute,
  • Eski pou annan prosedir tender ouver lo sa size, oubyen eski gouvernman pe negosye avek en lakonpannyen an partikiliye?
  • Rol Island Developing Company (IDC) dan sa bann proze,
  • Lakantite reveni ki gouvernman i eksepkte ranmase avek sa bann proze.

Minis Charlette in esplike ki gouvernman i annan plan pour fer sa proze konblaz dan «lavenir pros», me vi bann lezot proze nasyonal ki priyorite e bezwen ganny enplimante dan sa prosen de a trwa-z-an, sa bann konblaz pa pou ganny fer imedyatman.

En lot rezon ki in donnen, se ki anliny avek polisi makro ekonomik pour gouvernman redwir pre ki i fer a leksteryer ziska 50% nou GDP, i pa pou dan en pozisyon pour enplimant sa proze konblaz anba bidze nasyonal.

«Gouvernman in alors deside pour enplimant sa proze par faz ouswa entansifye son zefor pour esey ganny finansman atraver en don par en pei zanmi. Dapre bann estimasyon ki’n ganny fer nou panse ki sa proze an antye pou kout anviron 48 milyon ero  ki enkli mobilizasyon, demobilizasyon e osi konsey teknik,» Minis Charlette ti esplike.

«Sa bann proze konblaz pou konpri konble senk zone lo lakot les Mahé e en pti zil dan labe Grand Anse Praslin,» Minis Charlete ti azoute.

Minis Charlette ti azoute ki i lentansyon gouvernman pour annan en prosesis tender ouver pour sa proze konblaz me vi ki gouvernman i ankor pe rod sours finansman, mekanizm pour tender i kapab sanze depandan lo kondisyon kot sa sours finansman i sorti.

An sa ki konsern stokaz disab ki sorti dan fon lanmer, Minis Charlette ti fer remarke ki gouvernman in demann IDC pour antreprann en proze restok disab.

Gouvernman in vwar li preferab pour ki IDC i konmans sa demars avan lafen 2019 vi ki in ganny estimen ki sa stok ki egziste konmela pou fini alafen sa lannen.

«Pour menm rezon ki gouverman pa oule pret larzan pour antreprann proze konblaz, gouverman ti demann IDC pour fer sa proze lo en baz ki komersyalman viyab. IDC pe diskit avek son board e pe vin avek en propozisyon konplet. Dan sa propozisyon IDC i a pran en lón pour retir sa disab e anmenn ater, e atraver lavant sa materyo, i a rekiper son kou pour pey son lón. Si sa i ganny enplimante atraver sa mekanizm, gouvernman pou anmas zis taks (VAT) lo lavant disab,» Minis Charlette ti note.

Sepandan pour proze restor disab, IDC pou bezwen antre an diskisyon avek lakonpannyen Jan De Nul, en lakonpannyen etranze ki annan serten esklizivite lo sa de stok disab dan lanmer.

Sa i an akor avek en lagreman ki ti ganny sinyen ant gouvernman e Jan De Nul, e ki valid ziska lafen Novanm 2021.

Minis ti fer resorti ki IDC i osi annan sa lot opsyon pour fer son prop resers pour rod en lot stok disab anba lanmer.

I bon fer resorti ki Jan De Nul i annan lesklizivite lo sa de stok disab dan lanmer akoz sete sa lakonpannyen ki ti fer letid pour trouv sa de landrwa dan fon lanmer.

Minis Charlette ti osi fer byen kler ki IDC pa pe antreprann okenn proze konblaz, IDC in selman ganny demande par gouvernman pour antreprann sa proze restokaz disab.

Gouvernman ti swazir IDC akoz i en lakonpannyen finansyel ki stab e an plis se li ki pezer sa stockpile disab depi 2012, e gouvernman i satisfe avek lafason ki i pe fer sa.

Dapre Minis Charlette, gouvernman i antisipe pour anmas en reveni 15.6 milyon roupi zis atraver koleksyon VAT dan en lespas 7 a 8-an. Toudmenm se IDC ki pou deside konbyen i pou vann disab ki i kolekte.

 

More news