Bokou lensertitid lo kan sant formasyon pour bann zenn avek dezabilite Ans Norde pou reouver |23 March 2021
Paran i enkyet e ankoler, bann zenn i fristre
Plizyer paran ki zot zanfan adolesan e adilt avek dezabilite ti pe swiv bann formasyon kot sant vokasyonnel Ans Norde in eksprim zot lenkyetid e lakoler akoz zot dir lotorite konsernen pa pe donn zot lenformasyon neseser konsernan kan sa sant pou reouver.
Sa sant in fermen depi konmansman Desanm lannen pase e ziska ozordi pa ankor reouver e tou sa 30enn zenn e adilt i kot zot nanryen fer.
De parmi sa bann paran ki ti koz avek zournal Seychelles NATION yer i dir ki sa batiman ki pour plizyer lannen i dan en leta enpitwayab avek zis bann pti renovasyon ki’n ganny fer tanzantan, in aprezan pli avarye e i annan menm serten landrwa kot plafon pres pour tonbe, bann twalet in kase e tou lezot fasilite pa dan en leta pour reakey son bann okipan.
“Bann lasal i pti, napa ase vantilasyon e i fer tre so e i pa konvenab pour sa bann zanfan dan sa sitiasyon Kovid-19. Lannen apre lannen in annan zis bann pti renovasyon e la avek sa sitiasyon ki nou ladan sa landrwa i bezwen ganny en renovasyon mazer avek plizyer modifikasyon pour met anplas bann mezir lasante avan ki sa sant i reouver,” enn sa bann paran ti dir.
I dir ki bann paran i vreman dezapwente, ankoler e enkyet pour zot bann zanfan akoz zot al travay e sa bann zenn i reste tousel kot lakaz nanryen fer e sa i fer zot enkyet vi zot bann kondisyon lasante delika ki demann sirveyans kontinyel.
«In plis ki ler ki minister lafanmir i bouze e fer leneseser pour ki sa sant ava kapab reouver pour reakey sa bann zenn,» sa paran in dir.
Bann paran in eksprim zot dezapwentman ki ti napa okenn o responsab sorti kot minister lafanmir ki ti prezan pour sa vizit Vandredi.
Zot dir ki in ler pour nouvo Minis responsab pour lafanmir fer en vizit pour vwar pour limenm sitiasyon deplorab ki sa sant i ladan. Zot in fer resorti ki dan lepase in annan vizit apre vizit e bokou zoli parol ki pa’n abouti dan nanryen.
Antretan en travayer kot sa sant in fer nou konpran ki i sipoze annan en renovasyon mazer lo sa batiman avan ki i ekspekte ouver me ziska prezan i dir zot napa okenn lenformasyon lo kan sa travay i ekspekte konmanse.
I’n osi dir nou ki Vandredi bann zofisye lasante piblik ti vizit sa sant ansanm avek serten paran e reprezantan minister lafanmir e zot in konfirmen ki sa landrwa pa konvenab e pa pou kapab reouver avan ki sa bann travay i ganny fer e tou bann mezir proteksyon kont Kovid-19 i ganny met anplas pour sekirite bann zanfan ek bann travayer.
I’n osi fer resorti ki vi diferan kalite dezabilite sa bann zenn i difisil pour zot met en mask e bann zofisye lasante in ensiste ki bann lasal i ganny modifye pour kapab annan plis lespas pour fer distansyasyon sosyal anvi diferan kalite e nivo dezabilite sa group dimoun. Zot in osi fer resorti ki lasal izolasyon i bezwen pli gran e pran plis lili anka si plizyer zenn i bezwen ganny izole anmenmtan.
«Me an zeneral mon kapab dir ki sa landrwa ek son lanvironnman i aktyelman pa konvenab akoz i annan parmi sa bann zenn ki pa pou kapab pran vaksen anvi zot kalite kondisyon lasante. Me selman nou bann travayer nou toultan pozitiv e osito ki nou landrwa i ganny aranze parey i devret e nou ganny permisyon lasante pour reouver nou pou fer li me pour lemoman nou pe zis espere me nou okouran ki menm si in annan serten vizit e serten demars in ganny fer, prosedir tender pour sa travay pa ankor ganny fer,” i ti dir.
Antretan bann enstrikter ek lezot travayer kot sa sant zot kontinyen vin travay toulezour e zot pe mazinen ki mannyer zot pou organiz zot fason travay ler sa sant i reouver pour akey sa bann zenn avek dezabilite akoz i difisil pour fer sa group swiv bann mezir kont Kovid-19.
Zot pe mazin fer de oubyen plizyer group pli pti ki ava vin diferan zour. Me tousala pa ankor finalize.
Marie-Anne Lepathy