Ekriven Robert Mondon i rankontre Prezidan Ramkalawan State House |02 June 2021
Msye Mondon i prezant en kopi son liv avek Prezidan Ramkalawan (Portre : Jude Morel)
Swivan piblikasyon son nouvo liv avek tit ‘En Tapi Pyeste’, ekriven Seselwa Robert Mondon yer ti ganny sans pour rankontre Prezidan Larepiblik, Wavel Ramkalawan, e prezant li avek en kopi sa liv.
Pibliye avek siport Fon Nasyonal pour Lar ek Kiltir (NACF), sa koleksyon bann zistwar kourt an kreol, i premye travay mazer Msye Mondon, ki’n toultan pasyonnen par lektir, en pasyon ki’n enspire par son papa.
‘En Tapi Pyeste’, ki osi premye liv kreol ki sa fon in ede pour pibliye, i konpri bann zistwar baze lo diferan tenm, tel ki lanmour, vyolans, labi sibstans e bokou plis ankor.
Lenvitasyon pour Msye Mondon State House i anliny avek komitman Prezidan Ramkalawan pour promot kreativite, non selman parmi bann artis, me osi lepep Seselwa anzeneral.
Pandan sa vizit, diskisyon in osi tous lo bann diferan fleo ki pe afekte sosyete ozordi, tel ki vyolans ek labi zanfan ki osi form parti tenm bann zistwar dan liv Msye Mondon.
Lekritir pa nouvo pour Msye Mondon ki ti konmans ekrir a en tre zenn az. Alaz 18-an, Msye Mondon ti vwar 3 zistwar kourt ki i ti’n ekrir ganny valide e pibliye par Lenstiti Kreol.
Pour enpe letan apre, Msye Mondon ti’n abandonn son pasyon, ziska ki i ti aprann ki i malad.
I’n osi fer remarke en nouvo piblikasyon pou byento alaporte piblik, pli presizaman en kolaborasyon avek en Profeser Angle lo bann zwazo lo Lil-O-Vas (Bird Island).
Roland Duval