Follow us on:

Facebook Twitter LinkedIn YouTube

Health

Lapolis i fer en donasyon disan pour konmemor zot lazournen |22 September 2021

Lapolis i fer en donasyon disan pour konmemor zot lazournen

Dan kad selebrasyon zot lazournen yer, ki ti osi koensid avek Lazournen Enternasyonal pour Lape, serten manm lafors lapolis ti fer en donasyon disan kot sant transfizyon disan, Lopital Sesel.

Antou en ventenn zofisye lapolis sorti dan bann diferan stasyon lapolis lo Mahé, Praslin ek La Digue, parmi lekel ti de madanm, ti zwenn ansanm yer bomaten avek dis zofisye sorti kot Lazans Servis Tenny Dife ek Sovtaz, ki ti’n desann pour vin donn zot sipor dan sa zes saritab.

Zofisye relasyon piblik ek seksyon pour bon limaz dan lapolis, Kaporal Julinio Nourrice, ti dir ki lapolis ti’n aret fer sa zes zenere pour en pe letan e la zot anvi rekonmans ankor avek sa aktivite sirtou dan sa moman Covid-19.

I ti azoute ki zot pou esey mentenir sa aktivite lo zot kalandriye.

Kaporal Mira Marimba, ki fer premye fwa i donn disan, ti fer remarke ki napa en lot fason pour en dimoun ki malad ganny disan pour sov son lavi si en lot pa donn li.

I ti azoute ki menm si li i pa ankor deside si i pou vin en donner disan, i pou donn ankor son disan pour ed en lot si i ganny demande.

I ti dir ki, personnelman, i vwar li en dewvar pour bann polisye ki kapab pour vin devan e ed lezot ki bezwen led dan sa fason.

Ners ansarz labank disan kot sant transfizyon disan, Justina Hollanda, ti dir ki pour le moman, stok disan i ase stab dan preski tou bann group disan eksepte group A+ ki mank zot en pe.

I ti azoute ki granmersi zot annan ase disan ki O+ ki pe kouver sa mankman disan ki A+.

Ners Hollanda i azoute ki sa ogmantasyon disan dan zot stok in vin dernyenman apre ki sa sant in resevwar en bon pe disan atraver bann lorganizasyon ki’n organiz bann donasyon (blood drive).

I ti dir ki sa sant i bezwen kontinyen resevwar disan akoz sa prodwi, ki an gran demann, pa reste pour bokou letan.

 

Patrick Joubert

 

More news