Follow us on:

Facebook Twitter LinkedIn YouTube

Elections 2020

Kominike Lapolis |16 March 2022

 35 maren Endyen in ganny rimann pour lapes ilegal dan lanmer Sesel

 

Lapolis in raporte ki en total 32 manm lekipaz ek 3 patron trwa bato ti ganny anmenn devan Lakour Siprenm semenn pase, Mardi le 8 Mars kot zot in ganny rimann konman sispe pour lapes ilegal dan lanmer Sesel.

De (2) parmi sa 3 bato ti ganny vwar pe lapes dan zòn ekskliziv ekonomik Sesel le 5 Mars tandis ki lot ti ganny trouve le 6 Mars.

Lo enn sa bato apele ‘Dono’ ti annan 10 manm lekipaz ek en patron, tandis ki lo ‘Stsnabaka Arulapper’ ek ‘Infant Jesus’  ti annan 11 manm lekipaz ek en patron sakenn.

Angaze dan loperasyon deteksyon e eskor sa 3 boto lapes Mahé ti zofisye Sant Loperasyon Maritim Gard Lakot Sesel, tandis ki lenspeksyon ek lasezi egzibit ki enkli materyo lapes ek pwason ki ti’n ganny atrape ti antreprann par lapolis ek zofisye Lotorite Lapes Sesel ki pe fer lanket dan sa ka.

Tou le 35 sispe ki annan nasyonalite Endyen pou repas an kour le 22 Mars, 2022.

 

En zonm i ganny sarze pour plizyer lofans kriminel lo La Digue

 

En zonm 25-an sorti La Digue ki ti’n ganny arete konman sispe dan plizyer lensidan ki’n arive kont son ansyen konpanny lo La Digue ant le 9 ek le 14 Mars 2022, in ganny anmenn ankour yer bomaten kot in formelman ganny sarze pour sa bann lofans swivan.

Sa i enkli: vol, lagresyon fizik ki’n koz dimal lo en dimoun, posesyon en lobze ofansiv, tretman vyolans ek 2 ka trespas kriminel.

Lakour Mazistra in rezet laplikasyon bail pour ki sa akize i ganny large lo laliberte provizwar e rimann li prizon Montage Posée pour 14 zour.

 

Kominike sorti kot departman lapolis

More news