Lazournen Enternasyonal bann Zonm |19 November 2022

Bann partisipan ek envite dan en portre souvenir (Portre par Patrick Joubert)

‘Selebre Zonm Seselwa’

Pour mark Lazournen Enternasyonal bann Zonm ki ganny selebre le 19 Novanm, Minister Lazenes, Spor ek Lafanmir ti organiz en foronm en zournen edmi yer anba tenm ‘Selebre Zonm Sesel’ pour onor bann sikse ek lakonplisman bann zonm Seselwa pour fer avanse zot fanmir ek sosyete an zeneral.

Sa aktivite ki ti fer kot lotel Eden Bleu ti vwar partisipasyon en swasantenn zonm tou laz sorti dan tou kous lasosyete.

Sa bann zonm ti enkli zenn garson sorti dan bann sant profesyonnel, travayer dan sekter piblik e prive, parmi lezot lorganizasyon, osi byen ki zonm ki’n aret travay, sorti lo Mahé, Praslin ek La Digue.

Osi prezan ti Minis Dezinyen, Jean-François Ferrari; lezot minis; dirizan zafer gouvernman dan Lasanble Nasyonal, Onorab Bernard Georges; bann sekreter prensipal parmi lezot envite.

Sa foronm ti dan laform en diskisyon kot lodyans ti ganny sans enterakte e aprann lo lavi ek lakonplisman kat personaz: Anbasader pour Kiltir Patrick Victor; Paster Jude Fred; entreprener Jean-Michel Vidot ek Marc Arissol, ki ansarz lekol segonder Mont Fleuri.

Ler i ti pe koz lo rezondet sa foronm, Minis pour Lazenes, Spor ek Lafanmir, Marie Celine Zialor, ti eskplike ki son minister ti’n organiz sa foronm anvi ki bann zonm an zeneral dan Sesel zot rarman ganny piblisite ler zot fer keksoz ki byen e pozitiv apard ki bann kritik lye avek problenm sosyal avek zot ki ganny anplifye par bann piblisite tou lazournen.

I ti azoute ki akoz ki son minister ti selebre lazournen bann madanm an Mars sa lannen, i osi normal ki zot osi donn menm lanpler pour bann zonm ki pe kontribye dan lasosyete e bann ki’n kontribye pour en kantite lannen, zis pour donn en balans ekitab ant sa de ‘gender’.

“I annan en gran group zonm dan nou kominote Seselwa e dan lemonn osi tou, kot i annan bann bon keksoz ki zot fer,” Minis Zialor ti dir.

I ti fer remarke ki si pei pe debout e fer sikse ozordi, in pa’n vin zis atraver kontribisyon bann fanm me osi atraver bann bon kontribisyon ki pozitiv ki bann zonm in aporte zot osi.

I ti dir ki anvi ki sa i en selebrasyon sikse, zot in anvi anmenn bann zonm ki pe fer e ki’n fer bann bon kontribisyon anver zot fanmir ek lasosyete, dan sa foronm, ki a motiv bann ki pe fer negativite pour pran legzanp e sanz zot konportman. I ti azoute ki en selebrasyon i en selebrasyon e ki ler ou fer li ou pa anmenn bann keksoz negativ e sagrinan apard ki bann keksoz ki byen.

Minis Zialor ti fer konpran ki nou bezwen enkilke sa kiltir rekonnet dimoun ki’n fer bann byen fe dan lasosyete byen boner e non pa esper kot en lanterman pour fer sa.

I dir ki sa pou ede ankouraz bann zonm ki pe fer byen pour kontinyen kot a kot avek bann madanm zot a travay pour ede transform nou sosyete.

Sa foronm ti konmans avek sanson laglwar sante par Ziggy Adam, swivi par en refleksyon par Paster Jude Fred sorti kot ‘Everlasting Love Ministry’. Apre diskour louvertir par Minis Zialor, Lester Augustin, en ansennyan kot lekol primer Plaisance, ti resit son poenm avek tit ‘Zonm’, ki i ti’n ekrir pour sa lokazyon.

Pandan sa seremoni, santer e konpoziter John Wirtz ti ganny onore pour son lakonplisman dan lanmizik kot plizyer son bann sanson in ede lev moralite dan pei. I ti osi prezant lodyans avek enn son konpozisyon byen popiler ‘Lavi’, ki ti ganny byen apresye.

En partisipan, Versange Verlaque, en sekirite avek Fondasyon Zil Sesel (SIF) kot Vallée De Mai lo Praslin, ti dir ki in byen apresye sa levennman kot zot in ganny antre zot sa gran group zonm partaz zot sikse ek defi.

I ti dir ki sel fason pour annan pozitivite dan pei se pour annan respe ek lapartaz antre nou.

Lo son kote, Kaptenn Simon Laurencine, sorti kot gard lakot, ti dir in byen apresye sa deroulman li osi me letan pa ase anvi lakantite pwen ki bann partisipan ti ava anvi touse e aprann avek lezot pour fer en sanzman dan zot lavi.

Minis Zialor ti plitar dir ki zot anvizaze repet sa foronm anvi lakantite dimoun ki zot ti gannyen pour partisipe me ki plas ti limite.

Nou seleksyon portre i montre enn de moman for sa aktivite.

Patrick Joubert