Follow us on:

Facebook Twitter LinkedIn YouTube

Education

Bann lekol ki ti partisip dan Moman Kreativite i ganny rekonpanse |07 November 2019

Bann lekol ki ti partisip dan Moman Kreativite i ganny rekonpanse

Serten lekol gannyan pe repet zot performans pour bann envite kot seremoni donn pri yer (Portre : Thomas Meriton)

Pour mark lafen Festival Kreol, Minister Ledikasyon ek Resours Imen in rekonpans lekol ek etidyan ki ti   partisip dan Moman Kreativite semenn pase.

Seremoni prezantasyon pri ti deroul dan oditoryonm Lekol Formasyon bann Ansennyan (SITE) dan prezans Minis Ledikasyon ek Resours Imen, Jeanne Simeon; sekreter prensipal pour ledikasyon primer, segonder ek pti lanfans, Dr Odile Decommarmond; sekreter prensipal pour ledikasyon tersyer ek resours imen, Dr Linda Barallon.

Norbert Dogley, responsab departman lar dan Minister Ledikasyon, ti dir ki an zeneral Moman Kreativite pour sa lannen in pas byen.

“Nou travay avek bann kordinater dan lekol ki donn nou sa sipor,” Msye Dogley ti dir.

Msye Dogley ti azoute ki tou le lannen bann nouvo talan e nouvo figir i ganny dekouver ki montre ki bann zenerasyon ki pe vini pe pran en gran lentere dan Festival Kreol ek kiltir kreol.

Dan konkour pyes teat lekol Perseverans primer ti sorti premye swivi par Mont Fleuri primer. Dan kategori     segonder lekol Beau Vallon ti pran premye plas swivi par Plaisance segonder, e dan kategori pos-segonder Lenstiti Formasyon bann Ansennyan ti sorti premye swivi par Lakademi Letid Biznes Sesel (SBSA).

Dan konkour ladans premye pri ti al pour Anse Boileau primer swivi par La Rosière primer tandis ki pour segonder La Digue ti sorti premye swivi par Beau Vallon. Dan kategori pos-segonder Lakademi Tourizm Sesel (STA) ti sorti premye swivi par Lenstiti Nasyonal pour Lasante ek Letid Sosyal (NIHSS).

Dan konkour zistwar, Cascade primer ti ranport premye pri e Perseverance primer ti sorti dezyenm. Dan kategori segonder Plaisance ti rakle premye pri swivi par Beau Vallon e dan kategori pos-segonder Lekol Letid Avanse (Sals) ti ranport premye pri swivi par SBSA.

Dan konkour sanson Grand Anse Praslin primer ti ganny premye pri swivi par lekol Anse Aux Pins. Dan kategori segonder Plaisance ti ranport premye pri e Anse Royale ti sorti dezyenm e dan kategori pos-segonder SITE ti ranport premye pri swivi par SBSA.

Ti osi annan en pri spesyal pour bann etidyan ki ti meyer dan zot group e sa pri ti al pour Xenia Larue sorti Mont Fleuri primer e Jahim Pierre sorti lekol Perseverance primer, Rhy-Anne Vel e Marius Lafleur sorti Beau Vallon segonder, Kelly Mathiot sorti lekol biznes e Christopher Battin sorti SITE.

Pri pour meyer lekol ti osi ganny donnen. Dan kategori primer lekol Perseverance ti sorti premye swivi par lekol Mont Fleuri ; dan kategori segonder lekol Beau Vallon ek Plaisance ti partaz premye pri e dan kategori pos-segonder SITE ti ranport premye pri e SBSA ti sorti dezyenm. Sak gannyen ti ranport en pri larzan.

Christopher Battin, ki ti ranport pri pour meyer akter, ti dir ki zot in konmans prepar zot performans depi vakans Out. I ti azoute ki tou zanfan ti met en gran zefor e ozordi zot in kapab reisi ganny pri pour meyer lekol pos-segonder.

 

Christophe Zialor

More news