Rolly Lesperance i ganny sarze pour mert |07 June 2019

Rolly Lesperance, sa peser ki ti ganny retrouve apre ganny raporte manke depi boner mwan Mars ansanm avek de lezot koleg, in ganny sarze pour mert.

Sa zonm ti pas devan Lakour Siprenm yer e i’n ganny rimann pour 14 zour.

Nou ava rapel ki dan en kominike date le 4 Zen, lapolis ti dir ki rapor retrouvay Rolly Lesperance ti fer Lendi le 3 Zen ver 12:40 kordgard Baie Ste Anne atraver telefonn par en madanm ki ti idantifye li konman ser sa peser.

Dapre sa madanm, o moman son rapor, Lesperance, aze 58-an sorti Brillant, ti pe resevwar latansyon medilal lopital Praslin.

Dapre propriyeter bato rapor son bato manke an mer ti fer avek Gard Lakot le 27 Mars e avek lapolis le Premye Avril. Sa 3 peser abor ti Rolly Lesperance, George Riage ek Marcus Antat.

Dapre Lesperance, apre detrwa zour ki zot ti’n kit Cascade zot ti rankontre problenm avek masin bato e zot ti’n drive pour 45 zour ziska le 1 Zen, zour zot ti ariv obor en zil e la son 2 koleg ti deside sote e naze pour al rod led ater, me zot pa’n zanmen retournen.

Lesperance i dir ki Lendi le 3 Zen i ti trouv en bato pase e in kriye pour lasistans kot in pret en telefonn e “call” enn son manm fanmir ki’n vin sers li e anmenn li lopital Praslin.

Swivan loperasyon resers, ver 2:10 bato ‘Pti Sirenn’ ti ganny trouve mouye dan zanmerant zil Pti ek Gran Ser par zofisye ‘Marine Police’. Sa ti zanmerant ki lapolis ti’n ganny enformen lo retrouvay Lesperance.

Zefor par bato Gard Lakot avek serten son zofisye akonpannyen par zofisye lapolis ki pe fer resers dan lanmer konman ater pour retrouv sa 2 lezot zonm pa ankor abouti dan nanryen ziska prezan