Lanrezistreman voter-Selman 6% voter i enspekte rezis |18 January 2005
Msye Anaclet Tirant, Sef Zofisye Lanrezistreman, in dir ki i pa satisfe ditou avek lakantite dimoun ki’n al enspekte rezis voter ziska ler.
“Depi Merkredi 12 Zanvye, letan bann stasyon lanrezistreman ti ouver pour premye fwa ziska wikenn selman anviron 4,000 dimoun ki’n al tyek zot non lo rezis e sa i dezapwentan,” Msye Tirant ti dir.
Dapre Msye Tirant i annan anviron 62,000 dimoun ki kalifye koman en voter.
Alors in lans ankor lapel pour ki bann dimoun ki kalifye koman en voter pour fer li zot devwar e al enspekte rezis voter dan zot distrik oubyen kot Biro Komisyonner Eleksyon, Aarti Chambers, Mont Fleuri.
Me tou-d-menm in dir ki gro lapli ki’n tonbe pandan semenn pase ek wikenn in osi retard en pe sa legzersis.
Kantmenm sa, Msye Tirant in dir ki menm si an mwayenn selman anviron 600 dimoun par zour ti al verifye rezis voter pandan sa trwa zour lasemenn, lo kote wikenn in annan en amelyorasyon e sa ti ogmante pour ariv anviron 1,100 par zour.
Sa i fer ki Merkredi ziska Vandredi anviron 1800 dimoun ti al enspekte rezis tandis ki pandan wikenn (Sanmdi ek Dimans) sa sif ti ogmante pour vin 2,200.
Dapre bann statistik ki’n antre dan biro Sef Zofisye Lanrezistreman, Anse Aux Pins i distrik kot plis dimoun in al verifye rezis voter avek en to 10%.
Msye Tirant, ki'n dir ki bokou dimoun i kontan esper dernyen moman pour al fer sa legzersis, in prevwar ki sa wikenn i ekspekte vwar en logmantasyon dan lakantite dimoun ki pou vin enspekte rezis voter.
In osi lans lapel spesyal pour bann dimoun ki pa ankor transfer zot non dan sa distrik kot zot pe reste pour fer li.
Antretan dan bann distrik biro lanrezistreman i ouver depi 3er apremidi ziska 6er diswar pandan lasemennn (Lendi a Vandredi) e depi 10er bomaten ziska 2er apremidi pandan wikennn (Sanmdi ek Dimans).
Manm piblik i osi kapab al enspekte rezis voter kot Biro Komisyonner Eleksyon depi 9er bomaten ziska midi e 1er apremidi ziska 6er diswar pandan lasemenn e ant 10er bomaten a 2er apremidi pandan wikenn.