Jean Marc Volcy i demar lannen avek Bon bon bon |22 January 2005

Me pour santer renonmen Jean Marc Volcy, vi ki tar lannen pase i ti pe deza travay lo son nouvo albonm, sa i fer ki in pare atan pour lans son nouvote Bon bon bon.

Sa nouvo CD ki konpri 12 sanson i deza lo marse. Manm piblik pou kapab apresye bann nouvo nimero parey Lanmour Lin Demyel, Tonton DJ, Gout Kreol.

Jean Marc in osi ganny lasistans santez Morisyen, Wendy Duval, ki'n akonpanny li dan sanson Gout Kreol. Sa santez Morisyen in osi sant sanson Plere dan Lapli, en konpozisyon Jean Marc.

Bon bon bon i osi konpri plizyer vye sanson parey Manz Dimoun, Per Irene, Lavil Kangale, Kanbar Maron, ki Jean Marc in fer serten laranzman mizikal avek.
Par egzanp in fer Manz Dimoun vin en sokwe.

Jean Marc, ki'n ganny bokou enspire par Ton Pa, in dir ki Bon bon bon pou osi ganny vann lo marse Losean Endyen ensi ki serten pei Lerop, de marse ki i deza familye avek.

I ti fer resorti ki aktyelman Tonton DJ pe fer sikse Rodrigue e Ken Ken Ken lo Maurice.

Sa i sizyenm CD ki sa artis, ki ganny byen apresye lokalman osi byen ki dan Losean Endyen, i fer.

Albonm Bon bon bon in ganny rikorde kot Veuve Studio e i kout R125.

I anvant Kot Do, Rays Music Room ek Antigone, osi lo Praslin ek La Digue dan bann landrwa labitid.

Jean Marc in osi partaz enpe son bann lezot proze pour sa lannen e sa i en nouvo albonm apele Bonbon Sikre ki ekspekte pare ver lafen lannen.

I ti osi fer resorti ki in kontribye lo en konpilasyon Losean Endyen apele Per Sida. Sa ti en linisyativ Komisyon Losean Endyen dedye a bann viktim sa maladi.

J.L