Lasanble Nasyonal-Minis Faure i eksplik nouvo sistenm evaliasyon etidyan |24 March 2005

Deklarasyon Minis Faure ti ganny fer pandan sesyon lasanble semenn pase e ti an rezilta en demann ki bann manm ti fer pour ganny plis leklersisman lo sa size.

Sa nouvo sistenm, minis ti dir, i reprezant kontinyasyon reform dan ledikasyon ki ti konmanse an 1999 e ti bann eleman fondamantal nouvo polisi "Ledikasyon pour en Nouvo Sosyete." I osi anliny avek langazman pour met anplas en sistenm ledikasyon ki konpreansiv e ki rekonnet abilite sak zanfan, i ti dir.

Reform ki'n ganny fer dan sistenm evaliasyon i konpri premyerman litilizasyon bann metod modern pour teste performans zanfan alafen sak peryod letid (End of Cycle Assessments).

I annan antou senk peryod letid kle – depi lakres ziska P2, P3-P4, P5-P6, S1-S3 e S4-S5, e etidyan i ganny evalye alafen sak sa bann peryod. Minis ti dir ki travay lo evaliasyon performans bann zelev ant lakres ek S3 i ankor dan staz devlopman.

Dezyenm konponan sa nouvo sistenm i progranm e kalifikasyon enternasyonnal lo nivo S4-S5 kot progranm IGCSE in ranplas O' Level e Legzanmen Nasyonal in aboli. Sa i osi vwar labolisyon legzanmen ki ti ganny fer alafen sak trimes. Etidyan pe aprezan ganny evalye lo en baz kontinyel.

Premye group etidyan S5 ki ti konmans zot letid IGCSE lannen pase i ekspeke fer zot legzanmen an Novanm sa lannen. Bann etidyan ki pou kapab fer sa legzanmen i normalman ganny selekte e anrezistre pandan premye trwa mwan zot dezyenm lannen letid. Progranm IGCSE i ganny fer dan de nivo, enkli “Core” pour bann zelev ki zot nivo akademik i en pe ba e lot se “Extended” pour bann ki tre bon akademikman.

Ladopsyon IGCSE, minis ti eksplike, ti an rezilta konsiltasyon ki minister ti fer an 2000 avek Univeristy of Cambridge Local Examinations Syndicate, dan son demars pour elarzi loportinite pour ki plis etidyan a ganny akse avek en progranm e kalifikasyon ki ganny rekonnet lo en nivo enternasyonal. Lentrodiksyon IGCSE, i ti azoute, ti osi ganny fer swivan konsiltasyon avek paran.

IGCSE, minis ti eksplike, i met bokou lanfaz lo bann lyen ant letid akademik e bann problenm ki ganny trouve dan bann sitiasyon toulezour.

"Sa laranzman a benefisye bann zelev par donn zot sans swiv progranm swa o nivo ‘Core’ kot zot a kapab ganny grad C ki pli o ziska en grad G ki pli ba, oubyen o nivo pli avanse, ‘Extended’, kot zot a ganny en grad A* ki demontre en performans eksepsyonnel ziska en grad nivo E," Minis Faure ti dir.

I ti dir ki minister in konmans organiz en seri latelye lo sak size letid, avek bi ogmant kapasite bann ansennyan pour ki zot kapab delivre sa progranm IGCSE e ekip zot avek bann teknik pour pli byen evalye performans bann etidyan.

Minis Faure ti osi dir ki swivan rekonmandasyon, minister in konmans travay pour devlop e lokaliz son prop progranm evaliasyon lo nivo S4-S5, ki a ganny akredite par Cambridge. Sa progranm i ekspekte pare an 2010.

Trwazyenm konponan reform evaliasyon se lentrodiksyon “Records of Achievement” dan bann lekol an Zanvye sa lannen, ki pou dokimant lakonplisman bann etidyan toudilon zot lannen skoler.

"Bi se pour annan en sistenm kot nou kapab rikord bann lakonplisman akademik, ekstra skoler, sosyal ou personnel nou bann etidyan dan en fason sistematik e profesyonnel, ki a kapab ganny servi kan in ariv ler pour fer desizyon lo seleksyon pour bann lenstitisyon pos-segonder ou menm pour lanplwa," Minis Faure ti eksplike.