Legzibisyon Travay Trouve i ouver ziska le 24 Me |20 May 2006

Sa legzibisyon, avek tit Travay Trouve, ti ofisyelman ouver Vandredi pase par Minis pour Lanvironnman ek Resours Natirel, Ronny Jumeau, dan prezans plizyer envite ki ti enkli Minis pour Gouvernman Lokal, Spor ek Kiltir, Sylvette Pool ek lezot artis lokal.
Dan son ladres, Minis Jumeau ti dekrir Léon koman enn bann pli gran pent ki Seychelles in deza prodwi.

I ti dir ki sa legzibisyon Travay Trouve i fer Leon vin en kreater vi ki in "soufle nouvo lavi dan bann vye lobze rezete ki ti'n ariv dan labrin zot letan, pour kree bann lobze-d-ar", e sa i lans Leon lo en nouvo semen dan en parkour deza ranpli avek gran lakonplisman.

Avan ki i ti envit bann prezan pour dekouver talan Léon dan Travay Trouve, Minis Jumeau ti osi fer remarke ki Léon i premye artis pour fer en lekspozisyon solo La Bastille.

Dan son koleksyon ki i ti prezante Vandredi swar La Bastille ti bann  tablo osi byen ki bann lenstalasyon.

Leon ti dir ki in swazir La Bastille pour mont son legzibisyon akoz sa batiman i vye e antik e ki son latmosfer i marye byen avek sa kalite travay lar ki i fer.

"En lot lavantaz La Bastille se ki son miray i gran e blan, ki vedir ki mon bann tablo, ki tre sonm, i sorti byen lo la," i ti eksplike.

Apard La Bastille, Leon in osi met serten son bann travay dan koleksyon Travay Trouve kot Level 3 Bar dan batiman Docklands.

Ler i ti pe koz lo sa tit Travay Trouve ki in swazir pour son koleksyon, Leon ti fer resorti ki i reflekte enpe son stil ki i servi pour son form lar.

"Mon travay sirtou lo bann keksoz ki vin par azar, bann materyo ki mon trouve parsi parla, ki'n deza la me ki pour en rezon ou en lot in atir mon latansyon e ladan i annan en mark lepase," Léon ti dir, an azoutan ki i osi servi en teknik vyeisman pour donn karakter son bann louvraz.

Bann travay ki dan sa legzibisyon i osi anvant e pri i varye depi R3,000 ziska R25,000.