Mesaz Chairperson Lig bann Madanm SPPF pour Lazournen Enternasyonal bann Madanm-'Annou ranforsi linite, lanmour e tolerans dan nou lavi toulezour' |08 March 2007

Dan son mesaz, madanm Pool i osi fer rapel tenm anba ki Prezidan James Michel in dedye lannen 2007 -- Ansanm, Pour Lanmour Sesel –, en tenm ki i dir i enspir bokou refleksyon parmi nou bann madanm, dan nou fanmiy e dan nou kominote.

"Sa tenm i osi en lenvitasyon pour nou met nou pei avan tou," madanm Pool i dir dan son mesaz.

"Dan nou bann moman refleksyon i enportan ki nou met de kote nou bann diferans dan en fason ki nou a kapab ranforsi linite, lanmour e tolerans dan nou lavi toulezour. 

"Annou les sa tenm osi enspir nou dan nou lavi fanmiy, dan nou travay pour ki nou anmenn plis progre pour nou pei e finalman kot lape ek larmoni a kontinyen rennyen parmi nou pep.

"Mon swet tou manm Lig bann Madanm SPPF e tou lezot madanm dan Sesel bonn fet."