Bolot Feray lo gran lekran |01 March 2008
Organize par Lenstiti Kreol, sa film pe ganny zwe pour koensid avek nevyenm Lazournen
Prezan kot gran premyer sa film ti sekreter prensipal pour Lazenes, Spor ek Kiltir, Denis Rose, parmi plizyer envite distenge an kontan bann akter ki’n partisip dan sa film.
Bolot Feray i rakont ziswar en zonm dan son karantenn lannen ki ti’n tonm anmoure pour premye fwa dan son lavi e deside pour marye. Laswit i tourn otour bann senn baze lo bann krwayans ek prensip lontan, pli presizaman bann lannen karant ek senkant.
Sa film i ilistre bann diferan letap ek prosedir ki ti enplike avan, pandan e apre maryaz ensi ki bann diferan fakter ki ti enfliyans en tel levennman tel ki larelizyon ek siperstisyon.
Bolot Feray ti orizinalman ganny ekrir par Madanm Geva René e plitar ganny adapte e met an senn konman en pyes teat par Madanm Marie-Therèse Choppy. Sete an 1994 ki sa pyes ti ganny tranformen an en film. Bann akter prensipal dan sa film i Allain Belle dan rol Bolot Feray, Antonia Gabriel dan rol Pyerlin, Charles De Comarmond dan rol Ti Sarl, Merna Chetty dan rol Serafin e Raymonde Onezime dan rol Mafines.
Bolot Feray i en film ki’n gann klasifye pour tou piblik, e bann dat prozeksyon ek pri tiket pou ganny anonse tre byento.