Comedie des Seychelles i prezant de nouvo pyes teat |28 June 2008

Sa i « Zonm pa konn danse » e « Sis zour maryaz » ki pou zwe pandan en sel spektak Sanmdi le 5 Zilyet aparti 7.30 diswar.

« Zonm pa konn danse » ki son dire i anviron 45 minit, i rakont zistwar de zenn garson ki ti deside pour al pran par dan en konpetisyon ladans san pran kont ki zot ti pou bezwen perform osi ladans bale.

Dezyenm pyes teat, ki pou al pour enn erdtan, i rakont lavantir en zenn koup ki ti’n fek marye. Zot lavi maryaz ti vin en nespes boulvers akoz zot ti pe viv dan en lapartman preski antyerman vid.

Dapre meter an senn, Michael Sinon, zot in deside konbin sa de pyes pour donn zot lodyans en pe plis satisfaksyon e valer pour zot larzan vi ki tou le de pyes i ase kourt.

I ti azoute ki avek letan ek leksperyans, bann akter -- ki konpri Angella Ernesta, Nickman Robert, Fatima Horace e Steve Joseph -- pe vin pli konfidan lo lasenn e in promet ki performans pour sa spektak pou pli bon ki bann pyes oparavan.
Sa de pyes teat pe zwe pour dimoun tou laz.

Tiket pour spektak i kout R40 adilt ek R30 zanfan e i deza anvant kot lofis Tanmi dan batiman Pirates Arms e osi avek bann manm latroup.

Spektak pou bouz lo Pralen le premye e le 2 Out tandis ki bann Digwaz pou ganny sans apresye sa spektak son wikenn answit, setadir le 8 ek le 9 Out.

R. D.