« Maryaz Koko » i ranport premye pri dan Fon Lanmal |08 November 2008
Sa konpetisyon ti deroul kot Sant Konferans Enternasyonal Zedi le 30 Oktob e koleksyon Marisa ti ganny zize meyer parmi senk lezot.
Parmi bann envite spesyal pour sa sware ti Vis-Prezidan Larepiblik Msye Joseph Belmont, Minis pour Devlopman Kominoter, Lazenes, Spor ek Kiltir Vincent Meriton, ki osi tyermenn Komite Festival Kreol, e sekreter prensipal pour Lazenes, Spor ek Kiltir Denis Rose.
Sa senk finalis ti ganny swazir pou partisip dan Fon Lanmal apre ki zot koleksyon ti sorti meyer pandan sware Zenn Stilis ki ti fer pli boner pandan festival.
Atraver koleksyon Maryaz Koko, Marisa ti pe revaloriz koko, en resours ki’n aport bokou pour lekonomi pei dan lepase me ki konmela i ganny trouve partou.
Lo kote lanmod, lenspirasyon pour son bann morso in vin atraver diferan lanmod Afriken.
Dezyenm plas sa konpetisyon ti al pour Fatima Denis avek son koleksyon « Ros granit kouver par losean ». Bann lenz dan sa koleksyon ti pe demontre mouvman lanmer e dapre sa zen stilis, bann son laroul lo ros i kree en melodi e se sa ki’n enspir li pour travay lo son koleksyon.
Enspire par sa pwason apele Koi, Elsie Agathine ti pran trwazyenm plas avek son koleksyon « Lannwit Lizour ». Elsie i dir ki i admir sa pwason akoz i ranpli avek lenerzi e touzour pare pour afront okenn lobstak.
Lezot finalis sa konpetisyon ti Marie-Antoine Marguerite avek son koleksyon apele « Bourzwa Bourzwazi » ek Manuella Charlette ki ti pe partisip avek « Plim Egzotik ».
Sete Vis-Prezidan Belmont ki ti prezant gannyan sa konpetisyon avek son trofe tandis ki reprezantan lezot lorganizasyon ti prezant bann partisipan avek lezot pri ek kado.
Pandan sware lodyans ti osi ganny sans pour vwar diferan koleksyon fer par Mangouya Studio, stilis Natacha Laval ek Marie Rose, osi byen ki ekout plizyer morso mizikal par David Andre, Joe Samy ek Patrick Joseph.
En group Zanmi Festival Kreol ki konpri STB, ICCS, NAC e Bonjour Seychelles ti osi resevwar sertifika lapresyasyon. Pli boner pandan lazournen, Minis Meriton ti osi remet sertifika lapresyasyon avek Msye Igor Likhachev pour son kontribisyon anver Festival Kreol.