Miting konsiltativ Bel Air-Komisyon Medya ava ede fer zournalis vin pli responsab -- Prezidan |12 September 2009

“Sa komisyon a kapab fonksyonn anba en lalwa ki ava regle konportman bann zournalis e fer zot vin pli responsab anver sa ki zot raporte e osi annan disiplin,” Prezidan Michel ti dir pandan miting konsiltativ dan distrik Bel Air Zedi apremidi.

Prezidan ti pran laparol apre ki en zabitan ti’n met devan son konsern lo sa ki in dekri koman “bann mansonz” ki ganny pibliye dan serten zournal.

Prezidan ti dir ki en tel Komisyon, ki pou ganny met anplas tre byento, pou annan en rol sirveyans lo bann zournalis ek lapres e ki son bann manm pou reprezant bann diferan parti politik.

Sa miting Zedi, i tonm dan kad sa seri rankont ki Prezidan ek son bann minis pe fer dan tou distrik dan pei anba tenm “Koste Seselwa – Annou koz lo lavenir Sesel”.

Miting Bel Air, ki 18enm ki ganny organize ziska prezan, ti deroul dan prezans Vis-Prezidan Joseph Belmont, bann minis, ladministrater sa distrik, osi byen ki plizyer o zofisye dan gouvernman ek lakonpannyen paraetatik.

En lot pwen enportan ki ti ganny aborde pandan sa miting ti size devlopman lagrikiltir lo bann zil elwanye, e lo sa size Minis responsab pour lagrikkiltir, Msye Joel Morgan, ti anonse ki en proze pilot lagrikiltir pou byento komanse lo sa bann zil.

Sa ti vin an repons kestyon en zabitan lo plan gouvernman pour devlop lagrikiltir lo bann zil elwanye.

Minis ti dir ki gouvernman i kwar ki i annan en kantite potansyel lo nou bann zil e zot pe revwar posibilite rekomans prodiksyon dan sa bann landrwa.

I ti dir ki in annan plizyer zenn ki’n montre sa lentere pour devlop sa bann zil e deza Lakonpannyen Devlopman bann Zil (IDC) pe travay avek zot pour esey lwe zot en bout later pour zot komans fer bann proze pilot.

“Baze lo sa, nou pou sirvey zot bann aktivite tre pros e si tou i al byen, zot pou kapab osi ouver  loportinite devlopman pour bann lezot dimoun antre dan sa sekter lagrikiltir lo bann zil pour prodwir plis manze pour nou pei e petet a lavenir eksport serten prodwi,” Minis Morgan ti azoute.
I ti fer resorti ki dan lepase plizyer fakter in afekte prodiksyon, tel ki kou mendev ek  transportasyon osi byen ki mank delo.

Minis Morgan ti dir ki ozordi, avek nouvo teknolozi, in montre ki lagrikiltir i posib lo bann zil tel ki Desroches kot high intensity agriculture i kapab ganny fer.

“Lagrikiltir in vin en biznes e osi en aktivite ekonomik, me selman ladiferans se ki i en sekter tre enportan akoz i donn manze sa pep,” i ti dir.

I ti fer remarke ki ozordi dan pei napa ase fri ek legim akoz nou pe prodwi selman 45% sa ki nou pe konsonmen, selman 62% lavyann pork ki nou konsonmen e menm problenm i ek lavyann poul.

Ler i ti pe koz lo lezot loportinite pour devlopman lagrikiltir dan nou pei i ti devwale ki bann zenn in rakontre bokou kontrent dan lepase, tel parey mank later, problenm finansyer e osi lefe ki  i annan fermye ki pa’n devlop sa bann later lagrikiltir ki zot in gannyen e prezan zot in blok sa bann later e anpes lezot dimoun fer sa aktivite.

I ti dir ki lo nivo departman responsab pour lagrikiltir atraver stratezi pour sekirite alimanter zot in esey adres sa bann pwen.

Minis Morgan ti dir ek bann zabitan ki gouvernman in esey met diferan fasilite a dispozisyon bann zenn, tel parey bann pti morso later, bann loan ki zot kapab gannyen ki pli abordab e bann lasistans teknik o nivo bann formasyon par zofisye ek lazans lagrikiltir pour ed zot antre dan sa sekter

I ti dir ki sa bann stratezi ki zot pe met anplas in komans deza anmenn en rezilta ki vizib parmi  bann zenn dan lekol lagrikiltir ek ortikiltir (SAHTC).

“I ankor annan enpe problenm parey kontrent later pour devlopman e la nou pe esey ankouraz bann zenn pour zot al lo nivo teknolozi parey high intensity farming, intensive cultivation koumsa kot bann prodwi agrikol parey fri ek legim a kapab ganny kiltive lo bann pti kare later.

I ti azoute ki Departman Lagrikiltir ek SAHTC in esey entrodwir bann nouvo progranm pour form bann zenn, par egzanp par ankouraz zot pour fer work attachment avek sa lakonpannyen sinwan ki pe fer hydroponics, osi byen ki ek lezot dimoun ankor pour anmenn zot dan lagrikiltir high tech pour lavenir.

Minis ti osi anonse ki aktivite lagrikiltir organik i en lot landrwa kot i annan bokou loportinite ek potansyel pour bann zenn, sirtou lo nivo lakour e lo bann pti morso later.

En lot pwen ki ti ganny aborde dan miting ti konsern logmantasyon saler, e la kot Minis pour Finans, Msye Danny Faure, ti dir ki si tou dimoun i kontinyen debourye pour ede dan devlopman pei e si lekonomi i kontinyen progrese, sa size ava ganny adrese dan prosen bidze.

Lo size bann travayer etranze ki pe ganny anploye koman sales assistant, Minis pour Lanplwa ek Devlopman Resours Imen, Madanm Macsuzy Mondon, ti reasir bann zabitan ki gouvernman pa donn okenn permisyon bann etranze pour vin fer bann metye tel parey sales assistant ek drayver dan pei akoz isi i annan dimoun ki kapab fer sa bann louvraz. I ti dir ki Departman Lanplwa pe fer en legzersis tre serye lo sa konsern e sa bann dimoun ki’n ganny anmennen isi pour fer bann tel louvraz pou ganny deporte.

Minis Mondon ti dir ki i annan pozisyon tel parey managers ki ganny permisyon pour vin travay dan sa pos me i annan serten lakonpannyen ki profite e ler sa bann dimoun in antre dan pei zot pa fer sa ki zot in vin isi pour fer.

Lezot size ki Prezidan ek son bann minis ti adrese dan rankont Zedi ti bus shelter, bis piblik, semen, lalimyer, rol lapolis dan lakominote,  lentere o lo loan, proze home savings scheme, marsandiz ser dan laboutik,  parmi lezot ankor.

Prosen miting konsiltativ pou fer dan distrik Anse Royale Mardi le 15 Septanm apartir 5er apremidi dan sant kominoter sa distrik.