Lanrezistreman Voter 2010-4.7% voter i enspekte rezis ziska prezan |20 January 2010

Dapre Sef Zofisye Lanrezistreman, Anaclet Tirant, sa i en pe dezapwentan vi ki sa sif i reprezant selman 4.7% sa 68,214 dimoun ki kalifye pour enspekte rezis voter sa lannen.

I ti toudmenn dir i ekspekte ki pandan sa semenn sa sif i riske ogmante akoz dimoun i kontan profit bann dernyen zour pour verifye zot non lo lalis e fer sir ki zot bann lenformasyon i korek.

Msye Tirant in pran sa loportinite pour relans en lapel avek manm piblik pour al enspekte lalis voter dan zot distrik respektiv.

“Sa i en prensip ki lalwa i demande ki tou le lannen bann dimoun ki annan drwa vote i verifye zot non lo rezis voter. E sa i en legzersis ki zot bezwen fer pour asire ki tou lenformasyon lo rezis voter i annord e korek,” Msye Tirant ti dir.

In osi fer resorti ki menm si dimoun in tyek zot non elektronikman atraver enternet i enportan ki zot retyek zot non dan zot distrik respektiv pour zot resevwar sa resi konmkwa zot in verifye zot non.

Msye Tirant in dir ki tradisyonnelman distrik Anse Aux Pins i landrwa kot plis dimoun i al tyek zot non lo lalis e sa lannen sa tandans in kontinyen.

Pour le moman 10% dimoun ki kalifye dan distrik Anse Aux Pins in al enspekte lalis voter konpare avek selman 2.8% Glacis kot sif i pli ba. Sa i vedir ki 317 parmi sa 3151 dimoun ki kalifye pour vote dan distrik Anse Aux Pins in al tyek zot non tandis ki Glacis selman 94 parmi 3273 in fer zot devwar.
Lanrezistreman voter sa lannen pou ale ziska Dimans le 24 Zanvye.