Festival Kreol: Moman Kreativite |14 November 2013

Bann venker i resevwar zot pri

‘Moman Kreativite’ i en levennman dan kad Festival Kreol ki permet bokou zenn dan bann lenstitisyon skoler pour demontre zot kreativite ek talan artistik.

Bann venker sa aktivite sa lannen ti resevwar zot pri resaman dan en seremoni kot lasal Lekol Ledikasyon Mont Fleuri dan prezans sekreter prensipal (PS) pour Kiltir Benjamine Rose, direkter bann lekol primer dan Minister Ledikasyon Cyril Pillay, en reprezantan lakonpannyen Airtel Claude Horner, bann ansennyan ek zelev ki ti pran par dan ‘Moman Kreativite’.

Pandan sa seremoni bann zelev ti ganny sans reperform zot akt devan bann envite.
Bann pri ti divize an 6 kategori: Ti annan kategori konkour pyes teat ki ti ranporte par lekol Anse Boileau primer, Mont Fleuri segonder, e Lakademi Tourizm pour lekol pos-segonder.
Kategori ladans ti vwar Baie St Anne Praslin primer, La Digue segonder e Lekol Letid Biznes dan premye pozisyon.

Lekol Anse Boileau primer, Plaisance segonder e Lekol Letid Biznes ti venker pour kategori konkour zistwar/kont tandis ki konpetisyon sanson ti ranporte par lekol primer Grand Anse Praslin, Plaisance segonder ek Lekol Letid Biznes.

Ti osi annan pri pour meyer artis, ki rekonpans bann ki perform pli byen endividyelman. Dan kategori primer Naomie Adelaide sorti lekol Anse Boileau ti meyer artis fiy e Francesco Boniface ti meyer garson. Kelly Mathiot ek Daniel Fostel, toulede sorti lekol Mont Fleuri segonder ti meyer fiy ek garson pour kategori segonder.

Pour kategori pos-segonder, Alisha Jean-Louis ek Vincent Germain sorti Lekol Letid Biznes ti meyer fiy ek garson respektivman.

E dan tou konpetisyon meyer parmi le meyer i ganny rekonnet pour zot zefor anplis. Lekol Anse Boileau primer, Plaisance ek Mont Fleuri segonder, e Lekol Letid Biznes ti bann lekol ki ti ranport gran pri sa konpetisyon.

Bann portre ki swiv i montre bann meyer akter/aktris avek zot trofe ki ti gany prezante par PS Rose e sponsor par lakonpannyen Airtel.