Jerry ek Lindy Legras i selebre 25-an maryaz |15 July 2017

Jerry Legras ek Lindy Legras (ne Noël) ti selebre 25-an lanniverser maryaz Mardi le 11 Zilyet.

Sa koup ki reste North East Point ti marye le 11 Zilyet, 1992 e zot maryaz ti selebre par per Lonnie kot legliz St Antoine, Anse Etoile.

Mardi le 11 Zilyet, se per Eric Léon ek per Richard ki ti renouvle zot langazman maryaz pandan en selebrasyon ki ti asiste par zanfan sa koup, paran ek manm fanmir. Sa servis relizye ti swiv par en pti fonksyon kot Calypha Guest House.

25-an maryaz. Eski tou in fasil pour zot?

«Sa semen pa’n fasil me i pa enposib. Tou in posib avek Bondye o sant nou lavi familyal. Nou remersye tou dimoun ki’n zwe en rol enportan pandan sa bann letan. Pasyans, tolerans, pardonnen, lekout, lanmour i bann zengredyen tre enportan pour ariv tou sa letan,» sa koup ti dir avek zournal Seychelles NATION.