Per David Alcindor i selebre 25-an konman pret |04 August 2017

En gran nonm fidel sorti dan plizyer parwas ti zwenn avek levek Dyosez Katolik Monsenyer Denis Wiehe ek lezot pret ek dyak dan Katedral Imakile Konsepsyon Mardi apremidi pour selebre 25enm lanniverser  depi ki Per David Alcindor ti ganny ordonnen pret le 2 Out 1992.

En pti pe letan apre son lordinasyon Per Alcindor ti ganny konfye parwas Anse Royale kot in pas pli gran parti son 25-an koman pret avan ganny apele pour vin pret katedral detrwa lannen pase.

Osi prezan pour partaz sa gran moman lazwa avek Per Alcindor ti Monsenyer Emmanuel Lafont, en levek Franse ki isi a lenvitasyon Monsenyer Wiehe pour li anim laretret bann pret ki pou konmanse apartir sa wikenn e pou ale ziska le 12 Out.

Konm par koensidan Monsenyer Lafont ti li osi selebre 47-an depi ki i ti ganny ordonnen pret le 2 Out 1970.

I annan 13-an depi ki i’n ganny konsakre levek.

Ti pandan en servis aksyon de gras byen animen e antoure par son bann koleg pret ki Per Alcindor ti resevwar e aksepte bann lapriyer ek mesaz felisitasyon ek ve bonn sante osi byen ki ankor plis kouraz, lafors ek lasante pour sa prosen 25-an ankor ou plis.

Per Alcindor ti remersye tou dimoun ki ti’n rasanble pour vin priy avek li pour selebre e partaz son lazwa.

“Mon remersye Bon Dye dabor, li ki’n la touzour fidel. En pret i pa en pret litousel. En pret i en pret avek lezot e i en pret pour lezot, sanmenm ki toulezour ler mon leve mon remersye Senyer, mon rann li gras e demann li pour fer mwan vin touzour sa pret ki mannyer i ti a kontan mon ete,” Per Alcindor ti dir.

Letan i ti fer rapel bann fidel son parkour an retrasan enpe ki mannyer tou ti konmanse pour li, Per Alcindor i dir i ti enpe ezite.

“Ler mon ti ganny sa lapel mon ti ezite bokou. Mon ti dir Senyer be get mwan, mon annan en ta limit, en ta defo me dan mon lespri Senyer ti dir mwan fer li konfyans e asir mwan ki i pou avek mwan e ki mon pa pou tousle, alor mon ti dir wi a sa vokasyon,” Per Alcindor ti dir.

Per Lonnie Adrienne ti remersye Per Alcindor pour sa 25-an ki i’n pase o servis legliz. I ti felisit li pour reponn sa lapel plis ki 25-an pase e pour reste fidel malgre tou bann sekous ek dekourazman ki i’n kapab pas atraver.

I ti demann Lespri Sen lasante e pour enspir Per Alcindor pour li  kapab kontinyen anmenn lalimyer lafwa kot nou bann frer ek ser.

“I annan bokou lafen ek laswaf pour parol Bon Dye e pour Zezi Kri dan nou pei,” Per Lonnie ti dir.

Per Lafont osi ti annan mesaz lankourazman pour Per Alcindor e i ti profite pour demann bann paran pour ankouraz zot bann zanfan si e letan zot antann lapel Bon Dye pour vokasyon pret ou relizyez.

I ti partaz avek kongregasyon ki mannyer son fanmir ti kontan e ankouraz li letan i ti’n antann lapel e i ti dekri sa konman en gran loner pour li e pour son fanmir e i ti demann bann fanmir pour pa per me pour ankouraz zot zanfan.

Lo son kote Monsenyer Wiehe li osi ti felisit Per Alcindor pour bann travay remarkab ki i’n fer dan parwas Anse Royale, kot i’n pouse pour fer renovasyon mazer lo legliz St Joseph Anse Royale e osi reisi demoli en vye pti lasapel Pointe Au Sel e konstrir en zoli legliz dan son plas.

I ti dekri Per Alcindor konman en dimoun ki kontan lanmizik e kontan sante e asire ki bann seremoni relizyez i byen animen e byen vivan e i ti remersye Per Alcindor pour sa.

Li osi a son tour i ti demann bann zenn pour pa per letan zot antann lapel Bon Dye pour donn zot lavi o servis legliz.

I ti dekri vokasyon konman en trezor ki’n kasyet e ki fodre nou rode e osi en fler ki fleri e anmenn lazwa. I’n demann bann kominote ek bann fanmir pour ankouraz vokasyon e protez sa bann fler letan zot  konmans fleri pour ki zot kapab anmenn sa lazwa ki nou pei i vreman bezwen.