PUC pe travay pour re-etabli elektrisite lo La Digue |23 April 2018

Zabitan La Digue zot ekspekte sibir ankor koupir kouran pour sa prosen detrwa zour ziska ki PUC i fini fer travay reparasyon lo kab ki fourni zot elektrisite.

PUC in dir yer ki in idantifye landrwa kot sa kab elektrik 6km longer in ganny andomaze ant Praslin ek La Digue. Sa kab i sorti Zil Ev Praslin e i konnekte avek Ile Ronde avan ki i al konnekte avek La Digue.

Sef egzekitiv PUC Msye Philip Morin ti dir Sanmdi ki domaz avek sa kab in ariv an rezilta radmare ki’n arive pros avek Ile Ronde.

I dir ki letan sa domaz in arive Vandredi dan ver 11er diswar e ki’n koz koupir kouran La Digue, bann plonzer in esey al vwar dega me pa ti kapab fer gran keksoz akoz sitiasyon ti tre danzere e PUC in bezwen abandonn sa travay dan limedya.

Sa in fer ki PUC in bezwen sanz son lapros travay e depi yer, Dimans, in konmans transport bann nouvo kab ek lezot lekipman Ile Ronde.

“Nou pou repozisyonn sa kab ki sorti Ile Ronde, nou pou koup li ziska kot nou kapab arive san met lavi plonzer an danze e repozisyonn li lo Ile Rond pour kapab dan bann zour ki vini donn La Digue elektrisite lo en baz permanan,” Msye Morin ti eksplike.

Msye Morin in osi dir ki sa radmare in osi andomaz sa kab ki konnekte avek Ile au Cerf e ki fourni kouran bann zil dan zanmerant parey Ste Anne ek Ile Longue e PUC pe travay pour tir disab e repar sa bann dega ki pe afekte distribisyon elektrisite dan sa bann landrwa osi.

“Nou’n vwar bann domaz drol avek sa radmare ki’n ase sever e ki premye fwa nou’n eksperyanse. Depi 1985 depi ki nou annan kab dan lanmer, i premye fwa ki nou vwar en sitiasyon parey,” Msye Morin in dir.

Antretan PUC pe demann bann dimoun lo La Digue pour konserv kouran ziska ki sa pli gro kab i fini repare e distribisyon elektrisite i retourn normal.

Direkter egzekitiv divizyon elektrisite kot PUC Msye Ravin Sunassee li in dir ki PUC pe servi son pli pti kab pour kontinyen fourni kouran me dimoun pa pou ganny kouran full time akoz PUC i bezwen fer en progranm load shedding pour anpes  overload lo sa enn kab ki bon e evite ki en fot i devlope lo li. 

“Si bann konsonmater i diminyen kouran ki zot pe servi par tenny bann aircon, lalimyer ki zot pa pe servi sa i ava ed nou enpe e nou ava kapab annan en pe plis kouran pour donnen me si konsonmater i kontinyen servi bokou plis ki zot bezwen sa pou met presyon lo PUC,” Msye Sunassee i dir.