En latelye pour reviz ladans kanmtole |28 August 2004

Pandan sa latelye bann partisipan pou ganny sans diskit lo vre fason ki bann ladans tradisyonnel parey vals, kontredans ek kotis i danse. Zot pou osi revwar bann lepa sa bann diferan stil ladans.

Apre sa tou bann rekomandasyon pou ganny met an ekrir dan en dokiman.

Dapre organizater sa latelye, Alain Jules, sa dokiman ava enn standar kot tou bann fason danse ek regleman pou ganny pibliye. Sa, i ti dir, ava ede diminyen bann kontrovers ki annan sak fwa en konpetisyon ladans tradisyonnel i ganny deroule.

In osi dir ki sa dokiman i a donn bann ansennyan lanmizik ek ladans dan bann lekol plis bagaz pour montre bann zanfan ek lezot dimoun bann vre stil ladans kanmtole.

Msye Jules in dir ki alavenir i annan lide fer en film ladans e sa pou ganny realize apartir sa dokiman. Sa film pou swiv par en CD, ki pou enkli bann not ek parol. Manm piblik osi byen ki bann viziter pou kapab aste sa de travay.

"Lefe ki bokou touris i apresye nou bann ladans ek lanmizik tradisyonnel sa bann nouvo proze ava enteres zot. Sa ava osi en fason pour promouvwar nou ladans dan zot pei," Msye Jules ti dir.