Kouvan Sent Elizabeth-Prezidan i remersye bann leser |15 October 2004

Prezidan James Michel ti eksprim sa lapresiasyon Merkredi apremidi ler i ti al kot kouvan Sent Elizabeth apre travay.

“Mon kontan vwar i annan bann bon leser ki pe byen pran ka avet zot,” Prezidan Michel ti dir avek bann zanfan Fwaye Providans dan Kouvan Sent Elizabeth.

Prezidan Michel ti dir avek sa trantenn zanfan ek leser Sent Elizabeth ki i atas en kantite lenportans avek byennet e devlopman nou zanfan e lazenes.

“Mon oule vwar nou zanfan grandi byen,” i ti dir.
“Koman Prezidan mon pou fer mon mye pour pei kontinyen devlope, pour zot kapab grandi dan en bon lanvironnman e ki zot ganny bon swen,” Msye Michel ti azoute.

I ti osi dir ki son gouvernman a fer tou sa ki i kapab pour rann lavi bann zanfan pli ere.

Gouvernman, atraver Minister Zafer Sosyal ek Lanplwa, i kontribye bidze pour ed bann lorganizasyon parey Kouvan Sent Elizabeth pour donn swen bann zanfan ki pa pe reste ek zot fanmiy.  
              
Per Edwin Mathiot, ensi ki Ser Aimee avek lezot leser Sent Elizabeth ti la pour resevwar Prezidan ek son delegasyon ler zot ti ariv kot kouvan.

Bann zanfan ti sant enn de sanson lo lape ek limanite e apre prezantasyon kado zot ti envit Prezidan ek son lantouraz pour pran dite ek limonad avek zot.