"Marriage Coquillage" meyer koleksyon lenz dan Fon Lanmal 2004 |06 November 2004
Parmi bann envite ki ti'n vin vwar sa defile lanmod e apresye kreasyon sa bann zenn talan, ti Minis Morisyen pour Lar ek Kiltir, Msye Motée Ramdass ek Minis pour Gouvernman Lokal, Spor ek Kiltir, Madanm Sylvette Pool.
Gannyan sa konpetisyon zenn stilis pour sa lannen ti Natasha Laval ek son koleksyon apele “Marriage Coquillage”. Natasha, ki en etidyan dezyenmm lannen kot Kolez Lar ti dir ki in pran li bokou letan pour fer en tel proze ki enkli kat rob maryaz ek en resanz pour zonm. Son bann rob ek vwal osi byen ki resanz zonm ti'n ganny dekore e kree avek plizyer kokiy. Natasha ti resevwar son pri avek Minis Pool e Direkter Mauritius Commercial Bank (MCB), Msye Jocelyn Ah-Yu.
Dezyenm pri ti al pour trwa etidyan premye lannen avek zot koleksyon Hibiscus. Sa trwa zenn stilis -- Jelna Gabriel, Ginnie Williams ek Isabella Rath -- ti'n servi bokou kouler dan zot kreasyon ki ti donn sa limaz tropik. Zot ti'n met ansanm senk casual wear pour bann zenn fiy ek en stil plito modern.
Dan trwazyenm plas ti Nan Hoareau ek son koleksyon apele “Vakwa”. Nan i dir ki i ti'n swazir “Vakwa” akoz sa i en matyer lokal. Sa stilis ti manipil fey ek rasin sa plant lo latwal son bann lenz pour fer bann laform enteresan.
Bann lezot partisipan ti osi mont ek en seri koleksyon lenz anba diferan tenm tel ki “Kreolite an Modernite”, “Lanmour Fleri”, “Lape”, “Tec-Tec” ek plizyer lezot ankor ki sakenn ti inik dan son fason.
Dan Fon Lanmal ti osi annan en stilis Rodrige, Dominique Virassamy, ki ti prezant en koleksyon lenz casual osi byen ki maryaz. Lot prezantasyon ti bann lenz par Gemma Mein, en koudriyez lokal ki ti'n profite pour montre piblik son bann kreasyon pandan son letan lwazir.
Pandan sware ti annan plizyer prezantasyon mizikal par group Tapok sorti La Reunion e osi par en santer Rodrigez, Rose Mary Martin ki ti enterpret en sanson. En ansennyan kot lekol Kolez Lar, Barry Gertrude, ti osi la pour met enpe lanbyans kreol atraver lenterpretasyon plizyer sanson sante orizinalman par lezot artis Seselwa.