Brian Matombe i anmenn plis lanbyans tropik |13 November 2004

Apre son premye albonm solo apele Kas Pake lanse an Oktob 2001, sa zabitan Anse Boileau in retournen avek plis lanbyans tropik atraver en nouvo albonm.

Sa nouvo albonm, ki zisteman i apel Lanbyans Tropik, i’n fini ariv lo marse depi Lendi. I konpri 11 sanson pirman tradisyonnel ki rakont bann diferan sitiasyon lavi Seselwa lontan.

Atraver bann sanson parey Vals Bwalo, Karmen ek Derozer, Bal Kontredans, Popouri Moutya, Amelia e Ding Dong Bell, Brian i fer nou reviv bann labitid ek koutim ki Seselwa ti annan me ki aprezan in fini perdi.

I ti dir ki par egzanp Ding Dong Bell i rakonte ki mannyer lasas torti ti ganny fer lontan tandis ki Bal Kontredans i en sitiasyon komik ki ti pase dan bal kontredans ki ti tre popiler dan tan lontan.

“Mon bann sanson i rankont bann keksoz vre ki’n deza pase e serten parmi i tre komik,” i ti dir.

Fodre fer remarke ki Melodi, en lot nimero lo sa albonm, i travay Donatien Madeleine, ki osi zwe gitar bas.

Lezot mizisyen ki’n akonpanny li i Bruce Freminot (tanbour), Cyril Vital (gitar, vyolon ek benndyo), Brendon Agrippine (gitar), José Thelermont (lakordeon) ek Tony Julie (bas, keyboard).

Maude Esther, Antoinette Dodin ek Shelda William in osi sant serten sanson ansanm avek Brian.

Pour Brian, i toultan fer son bann sanson an Kreol akoz pour li laplipar Seselwa i koze e konpran Kreol alor son bann mesaz i ganny byen tande.

Lanbyans Tropik ki kout R125 i anvant kot Baba, Kot Do, Rays Music Room, Sekar e osi lo Praslin ek La Digue. Pour bann ki aste en kopi avek Brian zot pou pey selman R100.
 
S.A.