Gannyan show lagrikiltir ek ortikiltir i resevwar pri-Simon Adrien i sorti meyer |04 July 2005

Apard sertifika partisipasyon, en sonm R250,000 ti ganny distribye avek bann partisipan ki ti sorti premye, dezyenm e trwazyenm dan sak sa 13 kategori konpetisyon. Ti osi annan pri spesyal pour partisipan ki’n montre plis zefor ek dedikasyon dan sak sa baann kategori e osi pour sa enn ki’n partisip avek plis legzibit.

Simon Adrien ki ti sorti venker dan plizyer kategori konpetisyon ti resevwar pri spesyal pour meyer partisipan. Msye Adrien ki’n toultan fidel a sa konpetisyon ti resevwar R5000, en shield ek en revey donnen par Tropical Food.

Avan prezantasyon bann pri, tyermenn komite lorganizasyon Lafet Nasyonal, Danny Faure, ki osi Minis pour Ledikasyon ek Lazenes, ti dir ki sa seremoni i moman pour remersye bann partisipan pour zot zefor e dedikasyon. Minis Faure ti dir ki sa aktivite in ‘vin en mirwar lafors prodiktiv e kreativite nou bann dimoun.’

I ti dir i enpresyonnen par lakantite Seselwa osi byen ki etranze ki vizit bann legzibit pandan sa trwa zour ki show i deroule.

Minis Faure ti osi remersye tou bann dimoun ki’n ede avek lorganizasyon sa aktivite. I ti dir ki komite Lafet Nasyonal pou fer sir ki en bidze i ganny rezerve pour ki sa aktivite i kontinyen dan lavenir.

Antretan Msye Antoine Moustache, kordinater show lagrikiltir ek ortikiltir in dir ki i satisfe avek partisipasyon sa lannen menm si dan serten kategori konpetisyon in annan en mank partipisasyon. Msye Moustache in dir ki avek bann nouvo sizesyon ki’n antre, zot ekspekte ki 12enm edisyon lannen prosenn pou pli meyer.