En madanm i perdi son lavi an rezilta en bagar |10 January 2006

Dapre Asistan Sirentantan Godfra Hermitte, sete Sanmdi swar ver 8.41 ki lapolis ti ganny en kou-d-telefonn pour lasistans swivan en bagar ant de madanm kot laboutik V. Padayachy (Moutou), Corgat Estate.

Asistan Sirentandan Hermitte ti dir ki letan bann zofisye ti ariv dan sa landrwa zot ti konstate ki enn parmi sa de madanm, Madanm Cadence, ti’n perdi konesans.

I ti dir ki sa de madanm ti ganny transporte lopital Victoria e sete ver 9er diswar ki dokter ti deklar Madanm Cadence mor.

Sa lot madanm, ki en manm Gard Nasyonal, ti admit Hermitte Ward pour tretman swivan serten blesir ki i ti gannyen swivan sa bagar.

Touzour dapre Asistan Sirentandan Hermitte, letopsi ki ti fer yer bomaten i konfirmen ki Madanm Cadence in mor anrezilta dimal dan son latet e non pa par okenn zouti pwent.

Antretan lapolis in deza komans en lanket pour determin lakoz ek sirkonstans sa lensidan trazik.