Aksidan lo semen-3 dimoun i admit lopital |23 May 2006

Swivan en aksidan ki ti arive Union Vale Dimans swar, en zonm 27-an sorti Beau Vallon in admit dan ward lopital Victoria avek problenm likou, douler dan koud, zepol e dan son de kote lipye.

Aksidan ti arive apre ki loto ki sa zonm, an kontan drayver ek en lot pasaze, ti ladan ti kit semen e al rann lapel dan Vilaz Lespoir.

Dapre rapor lapolis, drayver ti perdi kontrol son transpor ler i ti pe desann ver semen Castor.

Sa lot pasaze dan sa loto ti ganny trete pour dimal pli leze apre ganny large.

An rezilta en lot aksidan, en pti garson 6-an sorti Pointe Larue i admit lo ward zanfan apre ki en loto ti tap li dan sa distrik Dimans apremidi.

Drayver sa loto in raport avek lapolis ki sa pti garson ti’n koup semen sorti deryer en pick-up ki ti’n park obor semen dan zanmerant laboutik msye Roger Francoise.

Kondisyon sa pti garson in ganny dekri koman stab.

Swivan en aksidan lo Praslin, en zonm i admit lo ward lopital Victoria apre ki i ti tonbe sorti deryer dan en pick-up Baie Ste Anne.

Sa viktim in ganny dimal dan latet e kros krose lo son lekor.

Dan en katriyenm aksidan ki ti arive Dimans swar, en transpor avek 4 dimoun ladan, ankontan drayver, ti kit semen e tonm lot kote kot View Point La Louise. Sa ti vin apre ki drayver ti’n perdi kontrol son transpor.

Napa personn ki’n ganny gran dimal swivan sa lensidan.

Letan sa lensidan ti arive sa transpor ti pe fer direksyon lavil.

Lapolis in osi raport detrwa lezot aksidan ki ti arive pandan wikenn kot selman tranpor ki’n sibir domaz. Dan enn sa aksidan, en taksi ti konpletman detri par dife Dimans swar La Misere.

Departman Tenny Dife ti ganny deplwaye pour lasistans me ler zot ti ariv dan sa landrwa sa taksi ti deza anflanm. Drayver sa taksi in raport avek lapolis ki i ti pe monte sorti Grand Anse pour al anvil ler i ti vwar lafimen pe sorti dan bonet son loto. I azoute ki la i ti aret son transpor, debarke e vwar dife dan konpartiman kot masin. Sa lensidan ti raporte avek lapolis ver 9.25 diswar.