Lapolis i bril 4,000 pye kanabis ek 4 kilo hashish |23 June 2006

Sa legzersis ti fer Zedi 22 Zen apremidi kot depo salte Providence dan prezans serten o zofisye lafors lapolis e osi direkter Drugs and Alcohol Council (Dac), Benjamin Vel.

Dapre portparol lapolis, Jean Toussaint, ki ti osi prezan, sa 4,000 pye kanabis ek 4 kilo hashish osi byen ki en pti morso heroin ki'n ganny detri Zedi i annan en lavaler plis ki 100,000 roupi.

Msye Toussaint ti eksplike ki pour sa bann drog, i annan ki ka in fini pas ankour e kot dimoun in kondannen e serten ka kot personn pa'n ganny pourswiv akoz napa lenvidans.

I ti dir ki ordinerman zot esper sifizaman ka pas ankour e apre ki lapolis i fer destriksyon sa bann drog ek sibstans. I ti fer remarke ki pandan letan ki bann zafer pe pas ankour, sa egzibit i ganny fermen dan en landrwa avek tre o sekirite.

Msye Toussaint in osi profite pour demann dimoun ki ankor pe fer trafik drog ilegal ou plant sa bann drog pour mazin byen lo lefe ki sa bann kalite sibstans i annan pa zis lo zot lasante me osi lo zot lavi familyal.

I ti fer resorti ki lapolis pou kontinyen fer son travay prevansyon ek deteksyon e pourswiv ou prosekit bann dimoun ki enplike dan sa bann tranzaksyon ilegal.

Msye Vel lo son kote ti fer remarke ki premye fwa i ganny envite pour asiste en tel legzersis, en zes ki montre ki lapolis i vreman serye e sa bann dimoun ki pe fer sa bann lasezi i vreman devoue dan zefor pour konbat sa fleo.

I ti osi azoute ki "dimoun i devret retir sa bann fo konsep dan zot lespri konmkwa ki pa tou sa bann drog ki ganny detri".