PUC i enpoz plis restriksyon lo delo trete |08 August 2006
Zofisye relasyon piblik kot PUC, Linda Philoé, in eksplike ki an rezilta letan sek ki pe persiste, sa i fer ki delo dan laplipar zot bann sistenm stokaz ek rezervwar pe diminyen tre vit. I ti fer rermarke ki nivo delo dan danm La Gogue ti’n ariv 40% yer e dan danm Rochon nivo ti 75%.
Avek sa nouvo restriksyon, plizyer landrwa pou ganny delo trete ant 6er a 8er bomaten e 3er apremidi a 8er aswar. Sa bann landrwa i Victoria ziska Anse Aux Pins, Victoria ziska North East Point, La Louise, Fairview, Belvedère, Rochon, Bel Air, Sans Soucis, Serret Road, St Louis, Pascal Village, Belonie, Ma Constance, Le Niol, Bel Ombre, Mount Simpson, Glacis ek Machabée.
La Misère dan leba pou ganny delo depi 6er ziska 8er bomaten.
Lefe ki i annan sifizaman delo dan sours Grand Anse Mahe e vi ki sistenm desalinasyon i an operasyon Anse Boileau, bann landrwa parey dan leba Anse Louis, Anse Royale, Baie Lazare ek Anse Boileau pou ganny delo depi 6er bomaten ziska 7er aswar.
Bann landrwa ki pou pli ganny afekte avek restriksyon se Quatre Bornes ziska Intendence e osi Anse Forbans. Delo pou koul pour selman 1 er-d-tan par zour e sa depi 6er ziska 7er bomaten. En lot rezyon ki pou ganny delo pour selman 1 er-d-tan, savedir depi 5er ziska 6er bomaten, i Quatre Bornes ziska Anse Takamaka, dan leo Takamaka ek leo Anse Louis.
Bougainville, Anse aux Poules Bleues, Dame le Roi – O Sed, dan leo La Misère pou ganny delo depi 5er apremidi ziska 7er aswar.
Bann landrwa parey Morne Blanc ek leo La Gogue pou ganny delo trete atraver bann bowser.
Lefe ki stasyon desalinasyon pe osi fonksyonnen lo Praslin ek La Digue, sa i fer ki zabitan sa de zil pou ganny delo trete depi 5er bomaten ziska 10er aswar.
Antretan, Manmzel Philoé in lans lapel avek manm piblik pour pa gaspiy delo e fer sir ki tiyo pa reste ouver. I ti dir ki sa i enportan akoz parfwa letan in annan restriksyon dimoun i tant pour bliye ferm robinen e letan delo i reouver si zot pa dan lakour i kapab annan gaspiyaz.
Manmzel Philoé ti dir ki dimoun pa devret pe servi delo trete pour aroz zot zarden e lav loto.
PUC in osi konmans en seri kozri dan bann lekol ek lezot letablisman touristik pour edik bann zanfan ek bann otelye lo fason pour konsonm e prezerv delo.