Konsey Bann Zil Kreol i fer son premye rankont |04 November 2006

 
Msye Nanty (portre a gos) pe adres premye miting Konsey Bann Zil Kreol

Sa rankont, ki ti’n ganny organize konman enn bann aktivite 21enm Festival Kreol, ti deroul La Bastille, e ti vwar partisipasyon plizyer manm sa konsey, ensi ki bann endividi ki annan serten lyen avek travay ki pe ganny fer par Konsey Bann Zil Kreol pour devlop kreol dan tou son dimansyon, ki enkli son konteks medyatik, antropolozik, e osi kiltirel. Sa rankont ti selman en premye rasanbleman sa konsey depi son kreasyon an 2005.

Prezan kot lansman sa rankont, ti Prezidan sa konsey, Patrick Nanty, ki ansanm avek en lot manm sa federasyon, Penda Choppy, ti anim sa seans travay sa zour.

Dan son ladres avek bann manm ek lezot endividi ki ti’n ganny envite pour fer zot kontribisyon anver sa konsey, Msye Nanty ti fer remarke ki “pour rezon pratik sa rankont ti pe deroul pandan Festival Kreol, moman kot plizyer manm konsey i deplase pour vin Seychelles pour sa randevou anyel”.

I ti dir ki alavenir, konsey i annan lentansyon organiz son bann rankont andeor Seychelles, «dan zefor pour soutenir lentere tou bann pei ki pe kontribye anver son legzistans, e pour fer zot santi konman zot vreman form parti sa federasyon”.

An pasan lo progranm son federasyon pour lannen 2007-2008, msye Nanty ti azoute ki sa rankont ti en lokazyon pour bann manm lasosiasyon Bann Zil Kreol Seychelles, ki en manm Federasyon Bann Zil Kreol enternasyonal, met devan bann rekonmandasyon ki zot kwar pour dan benefis sa federasyon.
Fodre note ki tou bann pei manm Federasyon Bann Zil Kreol zot annan en lasosiasyon domestik ki afilye avek sa pli gran federasyon enternasyonal.

Apard pas lo bann aktivite ki sa federasyon pe mazin organize pandan sa prosen douz mwan, msye Nanty ti osi devwale ki sa federasyon in akonplir depi son kreasyon lannen pase.

I ti dir ki byento sa federasyon pou ganny son lofis permanan ki pou dan batiman La Bastille menm.

I ti osi dir ki sa federasyon pe etabli en web site, en mannyer ki a pli fasil pour bann diferan lasosiasyon ki afilye avek Federasyon Bann Zil Kreol kapab reste an kontak avek kanmarad, e dekouver ki zot pe fer pour promot e devlop zot lyen komen, ki kreol.