Lanrezistreman Voter-Al verifye rezis boner |24 January 2007
Sa lapel i vin apre ki selman apepre 11,000 dan sa anviron 64,000 dimoun ki kalifye pour
Sa i reprezant apepre 17% nonm dimoun ki kalifye pour enspekte rezis voter k’in al fer zot devwar sivik ziska prezan..
Sef Zofisye Lanrezistreman, msye Anaclet Tirant, in dir ki lapli ki’n tonbe pandan wikenn in anpes dimoun desann an pli gran nonm pour al enspekte rezis voter, me i ekspekte ki lakantite dimoun pou ogmante diran sa semenn.
Dapre msye Tirant distrik kot plis dimoun in reponn lapel pour al enspekte zot non lo rezis i Anse Aux Pins, kot 817 dimoun in al fer zot devwar sivik.
Distrik Saint Louis i landrwa kot mwens dimoun in al verifye zot non lo lalis, avek selman 317 dimoun ki’n reponn sa lapel.
Msye Tirant in toudmenm fer remarke ki i annan dimoun ki prefere al tyek zot non lo rezis kot Biro Komisyonner Eleksyon olye dan zot distrik, e in fer remarke ki 689 dimoun in vin verifye zot non kot sa biro ziska prezan.
Fodre note ki nenport voter i kapab vin verifye zot non kot Biro Komisyonner Eleksyon, irespektiv distrik kot zot pe reste.
Msye Tirant in dir i swete ki plis dimoun i al verifye zot non pandan sa semenm e in demann zot pour pa esper dernyen moman pour fer li.
Antretan manm piblik i ganny rapel ki zot kapab al verifye zot non lo lalis dan zot bann distrik respektiv ant 3er apremidi ek 6er diswar pandan lasemenn (Lendi a Vandredi), e ant 10er bomaten ek 2er apremidi pandan wikenn (Sanmdi ek Dimans).
Zot osi kapab al verifye zot non kot biro Komisyonner Eleksyon, Aarti Building, lofis nimero 203, Mont Fleuri depi 9er bomaten ziska midi e depi 1er apremidi ziska 6er diswar pandan lasemenn. Dan wikenn sa biro pou ouver pour lanrezistreman depi 10er bomaten ziska 2er apremidi.
Voter i annan ziska Dimans le 28 Zanvye pour al verifye zot non lo rezis.