Dans dan lalin kler avek Leve Tradisyon volim 2 |17 November 2007

Kontrerman avek Leve Tradisyon ki annnan 17 morso lanmizik kanmtole (vals, kotis, polka ek lezot) ki dans dan lasal, lo albonm Leve Tradisyon volim 2, tou sa bann morso lanmizik i bann ki dans deor. Petet dan lalin kler parey tit albonm Leve Tradisyon volim 2 i dir.

In pran 2 mwan pour travay lo sa albonm ki annan 9 morso parey ronn, tinge, sokwe ek sega ki’n ganny rearanze.
Prodwi par Sega Vibes, sa albonm in rikorde dan Tanmi Recording Studio ki baze Mont Buxton.

Antou 7 mizisyen in partisip dan realizasyon sa albonm. Sa bann mizisyen i José Thélermont (lakordeon ek vokal), Eddie Créa (vyolon ek vokal), Brian Matombé (bonm ek vokal), Cyril Vital (gitar, bennjo ek vyolon), Fred Savy (gitar bas ek vokal), Bruce Freminot (tanbour, perkisyon ek vokal) ek Jack Valentin (gitar).

I reste pour vwar si Leve Tradisyon volim 2, ki annan 2000 kopi lo marse, i kapab atir menm latansyon ki Leve Tradisyon e menm konn en sikse enorm…