Reprezantan gouvernman ek fermye i diskit problenm mank manze zannimo |28 January 2008

Sa ti ganny anonse par Tyermenn Lasosyasyon bann Fermye Sesel, Msye Serge Benstrong, pandan en rankont ki mann sa lasosyasyon ti gannyen Vandredi avek reprezantan Minister Finans avek SMB.

Sa rankont, ki ti deroul kot Sant Formasyon pour Lagrikiltir ek Ortikiltir (SAHTC) Anse a la Mouche, ti annan pour bi diskit lo sa sityasyon mank manze zannimo ki pei ti pe fer fas avek pandan sa bann dernyen tan e esey trouv en solisyon pour sa problenm.

Letan i ti pe adres bann ki ti prezan pandan sa rankont, Msye Benstrong ti fer remarke ki konman en mezir tanporer SMB ti pe prodwir en serten kantite manze zannimo apartir diri, non pa mai, ki ava ede soutenir bann laferm ziska Merkredi sa semenn, ler matyer premyer pour prodiksyon i ekspekte antre dan pei.

Letan zot ti pe eksprim zot konsern ek santiman anver sa problenm mank manze zannimo, bann fermye kot sa rankont ti fer remarke ki zot bann zannimo ti pe ganny malnouri an se moman akoz zot bezwen rasyonn lakantite ki zot donnen pour asire ki tou le zour omwen i annan en pti morso pour zot manze.

Serten in menm sizere ki lotorite i merit pran desizyon pour fer vini manze ki’n fini prepare an prenan kont ki sityasyon i kapab agrave annatandan ki matyer premyer pour prodiksyon i rantre dan pei.

Bann fermye, ki ti’n menm sorti depi La Digue ek Praslin pour asiste sa rankont, ti osi demande ki gouvernman i revwar son bann kriter konsernan privatizasyon sa sekter.

Zot ti sizere ki sa sekter i merit ganny mete dan lanmen bann fermye lokal ki annan lagrikiltir aker, olye bann etranze ki, dapre zot, “pe zis rod profi”.