Sesyon demann kestyon dan Lasanble Nasyonal-Minis Shamlaye i eksplik prosesis evalyasyon progre dan lekol primer |27 March 2008
Minis Shamlaye ti pe donn detay swivan en kestyon par Manm elekte pour Takamaka Onorab Terence Mondon ki ti anvi konnen si sa minister in fer okenn letid aprofondi dan bann lekol primer pou evalye progre vizavi bann sanzman dan sistenm skoler pandan sa bann dernyen lannen.
Minis ti dir ki bann letid evalyasyon i kapab aprofondi kot sa limenm i en legzersis mazer oubyen i kapab entegre dan travay ordiner ki en seksyon konsernen i fer.
Koman bann sanzman oubyen linisyativ ki sa minister in entrodwi Minis Shamlaye ti sit detrwa legzanp tel ki School Improvement Programme (SIP) ki met bokou lanfaz lo planifikasyon devlopman sak lekol e osi devlopman profesyonnel ansenyan. Minis ti fer remarke ki evalyasyson sa progranm ti fer an 2002, 5-an apre ki i ti’n ganny entrodwir e sa evalyasyon ti fer an kolaborasyon avek en lekip resers Sid Afriken.
En lot sanzman ti lentrodiksyon ancillaries pou asiste ansenyan dan bann pti laklas e minister ansanm ek bann lekol pe swiv lenpak ki sa proze i annan lo sistenm skoler.
Vi ki amelyorasyon laprantisaz matematik i en defi ki sa minister in antreprann apre ki en letid enternasyonal ti montre ki bann zanfan i devret fer pli byen dan sa size, Minister ti lans proze Improvement of Pupils’ Achievement in Mathematics (IPAM) avek bi motiv zanfan e fer zot kontan sa size. Sa proze pou osi ganny evalye pli tar.
Pandan sa sesyon demann kestyon dan Lasanble Mardi, Minis Shamlaye ti osi reponn plizyer lezot kestyon tel ki lo sa servis ki egziste dan bann lekol kot son Minister i ofer pou sirvey zanfan e ed zot fer zot travay lakour apre lekol, travay renovasyon e maintenance lo bann lekol, incentives pour bann ansenyan, e osi abilite sa minister pou fourni sez ek latab tou bann lekol dan pei. Lo sa size, Minis Shamlaye ti dir ki son minister napa problenm pou fourni sak zanfan en sez ek en latab akoz sa i form parti bann keksoz debaz ki en zanfan i bezwen pour son laprantisaz . I ti fer remarke ki si tou lekol e servis konsernen dan minister i swiv prosedir ki an plas pa devret annan okenn problenm dan order oubyen delivery. Minis ti osi enform Lasanble ki pour sa lannen deza son minister in delivre 647 latab e 885 sez dan bann lekol e ki pour lannen 2007 sa minister in kolekte anviron 2300 sez e anviron 2000 latab ki’n andomaze sorti dan bann lekol. Ladan i annan ki pe ganny repare me lezot in right off.
An sa ki konsern vandalizm lo serten sa bann meb e lezot fasilite kot lekol, Minis Shamlaye in dir ki sa lannen bann lekol pe ranforsi sipervizyon pou asire ki okenn zanfan ki ganny trouve responsab pour okenn ka, i a bezwen, ansanm avek son paran, pran responsabilite pou ranplas sa meb oubyen repar okenn keksoz ki in andomaze.
Minis ti profite pour lans lapel avek tou dimoun dan bann kominote pou ranforsi zefor pou promouvwar sa kiltir respe pour propriyete tel ki bann meb e lezot fasilite ki Leta i met a dispozisyon tou zanfan kot lekol.