Kominike Lapolis-En sispe dan plizyer lofans kriminel i ganny blese avek bal |12 April 2008

Sa sispe ti ganny blese par en bal letan en zofisye ti pe defann son lekor apre ki sa sispe ti’n lans lo li avek en kouto. 

Sa lensidan ti ariv Les Mamelles ver 8er diswar Zedi letan sa zofisye ti pe esey aret sa sispe.  Sa zofisye ti resevwar tretman pour dimal dan latet e apre ganny large.

Sa sispe ti pe ganny reserse par lapolis pour enpe letan an koneksyon avek omwen 4 lensidan kas loto e vole, 2 lensidan kot in atak dimoun e vole, lofans kas lakaz e vole e osi pour lensidan bles son kanmarad.

Tou sa bann ka ki’n ganny raporte kordgard Mont Fleuri in ariv dan rezyon Les Mamelles, Roche Caiman, Plaisance e Mont Fleuri.

Kas lakaz e vole

En zonm i kondann 5-an prizon

Lapolis in raporte ki lakour in kondann Samuel Derjacques, sa zonm 22-an sorti Green Estate ki ti akize nimero 1 dan lensidan kas lakaz e vol en bon sonm larzan Anse Louis Dimans le 6 Avril.

Derjacques, ki ti pled koupab pour tou le 2 lofans Merkredi, in kondann 5-an pour kas lakaz e 5-an pour vole. 

Lakour sepandan in ordonnen ki sa de santans i mars ansanm, ki vedir sa kondannen pou fer selman 5-an prizon. 

Derjacques ti ganny arete Mardi avek en bon sonm sa bann larzan ki ti’n ganny raporte vole.  Sa ti enkli deviz ek larzan Sesel.
Dezyenm akize dan sa zafer vol, en manmzel 24-an sorti Dolphin Court, li i pou repas ankour le 21 Me, apre ki lakour in larg li lo serten kondisyon.