23enm Festival Kreol-Gran final konpetisyon ladans kanmtole i bouz dan Sid |24 October 2008

Sa aktivite, ki pou deroul demen Sanmdi le 25 aparti 7er diswar, pou swiv par en dinen e en gran bal dan lasal lekol politeknik.

Organizater sa aktivite in dir ki zot in re-enkorpor sa bal ek dinen alafen sa aktivite akoz sa de eleman ti atir en gran parti lafoul. Zot in osi azoute ki zot ti’n remark en bes dan lakantite partisipasyon apre ki pandan bann dernyen edisyon Festival Kreol zot ti’n retir sa morso e met lanfaz lo zis konpetisyon limenm.

Touzour dapre bann organizater, plizyer dimoun i profit sa lokazyon pour vin danse e anmiz zot lekor.

Pour aktivite sa lannen, piblik ki anvi zis vin get konpetisyon kanmtole pou pey R50 tandis ki bann ki pou vin osi dinen e danse pou pey R250. Fodre fer kler ki piblik pou napa drwa zis vin get konpetisyon e danse parey ti ete dan lepase.

Lo kote konpetisyon limenm, sa lannen bann manm ziri pou pli strik dan zot zizman.
Dan sa laliny, bann danser lo nivo segonder, pos-segonder e adilt pa pou ganny okenn detay lo zot ladans ziska ler ki zot ariv lo lasenn. Dapre bann organizater, lo en tel nivo, bann danser i devret pare pour egzekit nenport morso ladans a okenn moman.

Vi ki i annan bokou bann kliyan fidel sa aktivite ki reste dan rezyon lavil, komite lorganizasyon i an dyalog avek SPTC pour fer laranzman avan e apre sa aktivite.